ގެދޮރުވެރިޔާ ސްކީމްގެ ދަށުން ދޫކުރާ ފްލެޓްތަކުގެ މައްސަލާގައި ތުހުމަތު ކުރެވޭ ފަރާތްތަކުގެ މައްޗަށް ދައުވާކުރުމާ މެދު ގޮތެއް ނިންމުމަށް ޕްރޮސިކިއުޓާ ޖެނަރަލް (ޕީޖީ) އޮފީހާ އެކު މަޝްވަރާ ކުރަމުންދާ ކަމަށް އެންޓި-ކޮރަޕްޝަން ކޮމިޝަން (އޭސީސީ) އިން ބުނެފިއެވެ.

އޭސީސީން ރޭ ނެރުނު ނޫސްބަޔާނެއްގައި ބުނެފައިވަނީ އެ ކޮމިޝަނުން ތަހުގީގުކުރަމުން އަންނަ ގެދޮރުވެރިޔާ ސްކީމްގެ ދަށުން ފްލެޓް ދޫކުރުމުގެ މައްސަލާގައި ތުހުމަތުތައް ކުރެވޭ ފަރާތްތަކުގެ މައްޗަށް ދައުވާކޮށްދިނުމާ މެދު ގޮތެއް ނިންމުމަށް ޕީޖީ އޮފީހާ އެކު ރަސްމީކޮށް ޑިއުޓީ ޕްރޮސިކިއުޝަން މަރުހަލާ ފަށާފައިވާ ކަމަށެވެ. އަދި ޑިއުޓީ ޕްރިސިކިއުޝަންގެ މަރުހަލާ ނިންމައި ދައުވާކުރެވޭނެ ފަރާތްތަކުގެ މައްޗަށް ދައުވާކޮށްދިނުމަށް އެދެން ކުރަން ޖެހޭ މަސައްކަތްތައް އެ ކޮމިޝަނުން ވީހާ ވެސް އަވަހަކަށް ކުރަމުން ގެންދާނެ ކަމަށް އޭސީސީން ނެރުނު ބަޔާނުގައި ބުނެފައިވެއެވެ.

އޭސީސިގެ ބަޔާނުގައި އެއީ ކޮން ފަރާތްތަކެއް ކަން ހާމަ ނުކުރި ނަމަވެސް މައުލޫމާތު ލިބިފައިވާ ގޮތުން ދައުވާ ކުރަން މަޝްވަރާ ކުރަމުންދަނީ ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީނާއި ކުރީގެ ސީނިއާ އެގްޒެކެޓިވް ޑިރެކްޓަރު މުހައްމަދު އާރިފް އާއި ކުރީގެ ސީނިއާ އެގްޒެކެޓިވް ޑިރެކްޓަރު ލިރުގާމް ވަހީދު އަދި އެ މިނިސްޓްރީގެ ޑިރެކްޓާ ޖެނެރަލަކަށް މިހާރު ވެސް ހުންނެވި އަހްމަދު ވިޝާން ނަސީމްގެ މައްޗަށެވެ. އެމައްސަލައިގައި އެބޭފުޅުންގެ ޕާސްޕޯޓް ވެސް ވަނީ ހިފަހައްޓާފައެވެ.

އެ 4،000 ފުލެޓަކީ ނިމިދިޔަ ސަރުކާރުން އިއުލާނުކުރި ގެދޮރުވެރިޔާ މަޝްރޫއުގެ ދަށުން، ފުރަތަމަ ފުލެޓު ލިބޭ މީހުންނަށް ދޭ ތަންތަން ކަން ފާހަގަކޮށްލެވެއެވެ. ފުލެޓުތައް ދޫކުރުމުގައި މައްސަލަ އުޅޭ ކަމަށް ބުނެ، އެންޓި ކޮރަޕްޝަން ކޮމިޝަން (އޭސީސީ) އިން ތަހުގީގަށް ފަހު ބުނެފައިވަނީ 4،000 ފްލެޓް ލިބުނު މީހުންގެ ތެރެއިން 60 ޕަސެންޓް މީހުންނަކީ ޝަރުތުހަމަނުވާ މީހުން ކަމަށެވެ. އެލިސްޓް މުރާޖައާ ކުރަން އޭސީސީން ހައުސިން މިނިސްޓްރީއަށްވެސް ވަނީ އަންގާފައެވެ. ފުލެޓްތައް ދޫކުރުމުގައި ޖިނާޢީ މައްސަލަ އެއް ފާހަގަކުރެވޭނަމަ އެކަން ބަލަން ދައުވާ ކުރަން ފޮނުވުމަށް ޕްރޮސެކިއުޓަރ ޖެނެރަލް ވެސް އޭސީސީ އާއި ފުލުހުންގެ ޚިދުމަތަށް ވެސް ވަނީ އަމުރުކޮށްފައެވެ.