ސިޔާސީ ވިޔަސް ގައުމުގެ ކަރާމަތަށް އަރައިނުގަތުމަށް ކުރީގެ ބަންޑާރަނައިބު އައިޝަތު އާޒިމާ ޝަކޫރު ގޮވާލައްވައިފި އެވެ.

އެމްޑީޕީން ރާއްޖޭގެ ފަތުރުވެރިކަމުގެ ސިނާއަތަށް އަމާޒުކޮށް ޓެރަރިސްޓު ހަމަލާއެއް ދޭން އުޅޭކަމަށް ތުހުމަތުކޮށް ޓޫރިޒަމްގެ ސްޓޭޓް މިނިސްޓަރު މުހައްމަދު ނިހާދު ދެއްކެވި ވާހަކަތަކާ ގުޅިގެން އާޒިމާ ފޭސްބުކް ޕޭޖުގައި ވިދާޅުވީ ރާއްޖޭގެ ސިޔާސީ މައިދާނަކީ މިފަހަކަށް އައިސް ބޭނުންހާ އެއްޗެއްބުނެ، ބޭނުންހާ ކަމެއްކުރެވޭ ތަނަކަށްވެ ނިމިގެންގޮސްފައިވާ ކަމަށެވެ.

އެހެން ނަމަވެސް މިއީ ގަބޫލުކުރެވޭނޭ ކަންކަން ނޫންކަން ފާހަގަކުރައްވައި އާޒިމާ ވަނީ، އެފަދައިން ވިސްނާލުމެއްނެތި ބަސްބުނާ މީހުންގެ ކިބައިން ގައުމަށް ލިބޭ ގެއްލުން ފޫބައްދާނީ ކިހިނެއްތޯ، ސުވާލުކުރައްވާފަ އެވެ.

އާޒިމާ ވިދާޅުވީ ނިހާދު ދެއްކެވި ފަދަ ވާހަކަތަކަކީ މުޅި ގައުމުގައި ޖެހޭ ލައްތަކެއް ކަމަށާއި އަދި އެއީ ތައުލީމީ އަދި އިލްމީ ގާބިލުކަމެއް ނެތި ގޮވަމުން ގެންދާ ސިޔާސީ ގޮވެލިތަކެއްކަމަށް ވެސް އާޒިމާ ވިދާޅުވި އެވެ.

"މީގެ އިތުރުން، މިއީ އޮޅިގެން ދެއްކި ވާހަކައެއްކަމުގައި ޤަބޫލުކުރާކަށް އަޅުގަނޑަށް ފަސޭހައެއް ނޫނެވެ. އިއްޔެ މެންދުރާ ހަމަޔަށް ދިމާ އިދިކޮޅަށް ކުޅެން ތިބިބަޔަކަށް ފުރުސަތެއް ލިބުމުން، ބައިކޮޅަށް ގޯލެއް ނުޖަހާނޭކަމަށް ހަމަ ގަބޫލުކުރަން ދަތިވަނީއެވެ." އާޒިމާ ވިދާޅުވި އެވެ.

އެއްކޮޅަށް ވިޔަސް އަދި އިދިކޮޅަށްވިޔަސް، ގައުމު އިނދަޖެހޭ ވަރުގެ އެއްޗެހި ސިޔާސީ ގޯލްޖަހަން ބަސް ވިދާޅުނުވުމަށް އާޒިމާ ވިދާޅުވި އެވެ. އަދި ގައުމަކީ އަޅުގަނޑުމެންގެ އެންމެންގެ ހައްގަކަށްވާ އިރު އެއީ އަޅުގަނޑުމެންގެ ދަރިން ދިރިއުޅެން އޮތް ތަންކަންވެސް އާޒިމާ ހަނދާންކޮށްދެއްވި އެވެ.

އެހެންކަމުން ސިޔާސީ ވިޔަސް ރާއްޖޭގެ ކަރާމާތަށް އަރައި ނުގަތުމަށް ވެސް އާޒިމާ ގޮވާލެއްވި އެވެ.