ދިވެހި ގައުމަށް ހެޔޮގޮތް ހޯދުމަށް އެންމެން އެކުވެރިވާންޖެހޭ ކަމަށް ޖުމްހޫރީ ޕާޓީގެ ލީޑަރު، ގާސިމް އިބްރާހިމް ވިދާޅުވެއްޖެ އެވެ.

ސުނާމީ ކާރިސާއާ ގުޅިގެން ފާހަގަކުރަމުން އަންނަ ދިވެހިންގެ އެއްބައިވަންތަކަމުގެ ދުވަހާއި ގުޅިގެން އެކްސްގައި ކުރެއްވި ޕޯސްޓެއްގައި ގާސިމް ވިދާޅުވީ މި މުހިންމު ދުވަހުގައި ޢަޒުމު އާކުރަންވީ އާ ހިތްވަރަކާއި އެކު އެކުވެރިކަމާއި އެއްބައިވަންތަކަން އަލުން ދިރުވުމަށް ކަމަށެވެ. އަދި ޤައުމަށް ދިމާވާ ކޮންމެ ނިކަމެތިކަމަކުން އަރައިގަތުމުގައި ރައްޔިތުންގެ އެއްބައިވަންތަކަމަކީ ކޮންމެހެން ލާޒިމް ކަމެއް ކަމަށް ޤާސިމް ވިދާޅުވިއެވެ.

"ދިވެހި ޤައުމަށް ހެޔޮ ގޮތް ހޯދުމަށް އެކުވެރިވެ އަބަދުވެސް އަތުގުޅާލައިގެން ތިބުމަކީ ޤައުމުގެ ހައްޤުގައި ކޮންމެހެންވެސް ކުރަންޖެހޭ ކަމެއް،" މާމިގިލީ ދާއިރާގެ މެމްބަރު ގާސިމް ވިދާޅުވި އެވެ.

ސުނާމީ ކާރިސާގައި ރާއްޖެއިން ޖުމުލަ 82 މީހަކު ނިޔާވިއިރު 26 މީހަކު ވީ ގޮތެއް ނޭނގި ގެއްލުނެވެ.

ސުނާމީ ކާރިސާ ކުރިމަތިވީ 2004 ވަނަ އަހަރުގެ ޑިސެންބަރު 26 ވަނަ ދުވަހުއެވެ. އެހާދިސާ އަށް މިއަދު 20 އަހަރު ވަނީ ފުރިފައެވެ. 2005 ވަނަ އަހަރުން ފެށިގެން ސުނާމީ އެރި ދުވަސް ރާއްޖޭގައި ފާހަގަކުރަމުން އަންނަނީ އެއްބައިވަންތަ ކަމުގެ ދުވަހުގެ ގޮތުގައެވެ.