ވަޒީރުންގެ މަޖިލީހަށް މިއަދު ގެންނެވި ބަދަލާއި ގުޅިގެން، އެ މިނިސްޓްރީތަކުން ކުރަމުން ގެންދާ މަސައްކަތްތަކަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ބަދަލު ގެންނަވައިފިއެވެ.

ރައީސް އޮފީހުން ބުނީ ބުރާސްފަތި ދުވަހު އުވާލި މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓުން ކުރައްވަމުން ގެންދެވި، ރާއްޖޭގެ ބިން ބޭނުންކުރުމާ ގުޅޭ މަސައްކަތްތަކާއި، ރާއްޖޭގެ އަރބަން ސަރަހައްދުތައް ތަރައްޤީކުރުމާބެހޭ މަސައްކަތްތަކާއި، ޤައުމީ ތަރައްޤީ ރޭވުމާބެހޭ މަސައްކަތްތަކާއި، ތަފާސްހިސާބުގެ މަސައްކަތްތައް، މިނިސްޓްރީ އޮފް ފިނޭންސް އެންޑް ޕްލޭނިންގއިން ކުރަމުން ގެންދާގޮތަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ހަމަޖައްސަވާފައިވާކަމަށެވެ. އަދި ރާއްޖޭގެ ހިޔާވަހިކަމުގެ ސިޔާސަތު ކަނޑައެޅުމާބެހޭ އެންމެހައި މަސައްކަތްތަކާއި، ސޯޝަލް ހައުސިންގއާބެހޭ އެންމެހައި މަސައްކަތްތައް، މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރއިން ކުރަމުން ގެންދާގޮތަށް ހަމަޖައްސަވާފައިވާ ކަމަށް ރައީސް އޮފީހުން ބުނެއެވެ.

މީގެ އިތުރުން މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓްގެ ދަށުން ހިނގަމުންދިޔަ، "މޯލްޑިވްސް ބިއުރޯ އޮފް ސްޓެޓިސްޓިކްސް" އަކީ މިއަދުން ފެށިގެން، މިނިސްޓްރީ އޮފް ފިނޭންސް އެންޑް ޕްލޭނިންގގެ ދަށުން ހިންގަމުންދާނެ ތަނެއްގެ ގޮތުގައި ރައީސް ހަމަޖައްސަވާފައިވާ ކަމަށް ރައީސް އޮފީހުން މައުލޫމާތުދެއެވެ.

ސަރުކާރުގެ ބައެއް ވުޒާރާތަކުން ކުރަމުންގެންދާ މަސައްކަތްތަކަށް ރައީސް މުޢިއްޒު ގެންނެވި ބަދަލުތަކާއެކު، ދައުލަތުގެ އިދާރާތަކުން ލިޔުއްވާ ސިޓީގައި ނަންބަރު ޖެއްސެވުމުގައި، މިނިސްޓްރީ އޮފް ފިނޭންސް އެންޑް ޕްލޭނިންގއަށް ލިޔުއްވާ ސިޓީގައި ޖައްސަވަމުން ގެންދަވާނީ، މިހާތަނަށް މިނިސްޓްރީ އޮފް ފިނޭންސަށް ހަމަޖައްސަވައިފައި އޮތް ނަންބަރު 13 ކަމުގައި ވަނީ ކަނޑައަޅުއްވާފައެވެ. އަދި މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރއަށް ލިޔުއްވާ ސިޓީގައި ޖައްސަވަމުން ގެންދަވާނީ، މިހާތަނަށް މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރއަށް ހަމަޖައްސަވައިފައި އޮތް ނަންބަރު 491 ކަމަށް ރައީސް އޮފީހުން ބުންޏެވެެ.

ވަޒީރުންގެ މަޖިލީހަށް ގެންނެވި ބަދަލާއި، ބައެއް ވުޒާރާތަކުގެ ނަމަށް ގެންނެވި ބަދަލުތަކާއެކު ވަޒީރުންގެ މަޖިލީހަށް ޢައްޔަންކުރެއްވި ބޭފުޅުންނަށް މަޤާމުގެ ފަތްކޮޅު ދެއްވާފައިވަނީ ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތުގައެވެ. ވަޒީރުންގެ މަޖިލީހުގެ މެންބަރުކަމުގެ ހުވާކުރައްވައި، ހުވައިގެ އިޤްރާރުގައި އެ މެންބަރުން ސޮއިކުރެއްވުމަށް ފަހު ރައީސް ވަނީ އެ ބޭފުޅުންނާ ބައްދަލުކުރައްވައި، މިނިސްޓްރީގެ އޮނިގަނޑު އެކުލަވާލުމުގައި ބަދަލުވާ މުވައްޒަފުންނަށް ދަތިނުވާނެގޮތަށް ކަންކަން ހަމަޖެއްސެވުމަށް އެދިވަޑައިގެންފައެވެ.