ކަރަންޓްގެ ހާލަތު ރަނގަޅު ކުރުމަށް ސްޓެލްކޯއިން މާލެއަތޮޅު މާފުއްޓަށް އިތުރު ދެ ޖެނެރޭޓަރު ސެޓް ގެންގޮސްފިއެވެ.

ސްޓެލްކޯއިން ބުނީ މާފުށީގައި އިތުރުވަމުން އަންނަ ކަރަންޓުގެ ޑިމާންޑާ އެއްވަރަށް ހިދުމަތް ފޯރުކޮށްދިނުމަށްޓަކައި، މާފުށީގައި ކަރަންޓު އުފައްދާ މިންވަރު އިތުރުކުރުމަށާއި، ޕީކް ސީޒަނަށް ތައްޔާރުވުމުގެ ގޮތުން އެއް މެގަވޮޓްގެ ދެ ޖަނަރޭޓަރު ސެޓާއި، ސްޓެޕްއަޕް ޓްރާންސްފޯމަރެއް މިހާރު އެރަށަށް ގެންދެވިފައިވާ ކަަމަށެވެ.

ފަތުރުވެރިކަމުގެ ދާއިރާގައިވެސް ރާއްޖޭގައި އެންމެ ކުރިއަރާފައިވާ އެއް ރަށުގެ ގޮތުގައި ފާހަގަކުރެވޭ މާފުއްޓަކީ ފަތުރުވެރިންގެ މަގުބޫލު މަންޒިލެކެވެ. އެރަށުގައި ގިނަ އަދަދަކަށް ގެސްޓްހައުސް ހުރިކަންވެސް ފާހަގަ ކުރެވެއެވެ.

ސްޓެލްކޯއިން ބުނީ މާފުއްޓަށް މިހާރު ގެންދިޔަ ޖަނަރޭޓަރުތައް ކޮމިޝަން ކުރެވި، ބޭނުންކުރަން ފެށުމާއެކު، މާފުށީގައި އެ ކުންފުނިން ދެމުންގެންދާ ކަރަންޓުގެ ހިދުމަތް އިތުރަށް ފުރިހަމަވެގެންދާނެ ކަމަށެވެ.