މިއަދުގެ ހުކުރު ނަމާދުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު، އެމަނިކުފާނުގެ ދެފަރާތުން ހުސްޖާގަ ބަހައްޓަވައިގެން އިސްލާމީ މަރުކަޒުގެ ކުރީ ސަފުގައި އިންނެވިކަމަށް ބުނެ ދެކެވޭ ވާހަކަތައް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިރޭ ދޮގުކުރައްވައިފިއެވެ.

މިނިސްޓަރު މިހެން ވިދާޅުވީ ރާއްޖޭގެ ޓީވީތަކުން ދުރައްދެއްކި އިސްލާމީ މަރުކަޒުގެ މިއަދުގެ ހުކުރު ނަމާދުގެ އެންމެ ކުރީ ސަފުގައި އިންނެވި ރައީސް ޑރ. މުއިއްޒުގެ ފޮޓޯ އާއި ވީޑިއޯ ސޯޝަލް މީޑިއާގައި ދައުރުކޮށް، އެމަނިކުފާނު އިންނެވީ ބޮޑާކަންމަތީ ދެފަރާތުގައި ތިބި މީހުންނާ ދެމެދު ހުސްޖާގަ ބަހައްޓަވައިގެން ކަމަށް ބުނެ ދައްކާ ވާހަކަތަކާ ގުޅިގެންނެެވެ.

އިސްލާމިކް މިނިސްޓަރު ޑރ. މުޙައްމަދު ޝަހީމް މިރޭ ވިދާޅުވީ، މިސްކިތުގެ ޖަމާއަތުގައި ހުސްޖާގަ ބެހެއްޓެވުމަކަށް ރައީސް މުޢިއްޒު ދުވަހަކުވެސް އަންގަވާފައި ނުވާކަމަށެވެ. ޝަހީމް ވިދާޅުވީ އެމަނިކުފާނާ މެދު ދޮގު ވާހަކަތައް ފެތުރުމަކީ ބަލައިގަނެވޭނެ ކަމެއް ނޫން ކަމަށެެވެ. އަދި ރައީސްގެ ދެފަރާތުގައިވާ ހުސްޖާގައަކީ މިސްކިތުގެ ބަންގި ގޮވާ މުދިމާއި އިމާމުންގެ ޖާގަ ކަމަށް ޝަހީމް ވިދާޅުވިއެވެ.

މިނިސްޓަރުގެ ޕޯސްޓުގައި އެކި ދުވަސް މަތިން ރައީސް މިސްކިތަށް ވަޑައިގެން ޖަމާއަތުގައި ބައިވެރިވެވަޑައިގެން އިންނަވާ މަންޒަރު ފެންނަ ފޮޓޯ އަދި، މިސްކިތު ތެރެއިން އާންމުންނާ ބައްދަލުކުރައްވާ ފޮޓޯތައް ހާމަކުރެއްވި އެވެ.