2028 ވަނަ އަހަރު ބާއްވާ ރިޔާސީ އިންތިހާބު ކާމިޔާބުކުރަށްވާނެ ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެެވެ.

ޓީވީ ޕްރޮގުރާމެއްގައި މިރޭ ވާހަކަ ދައްކަވަމުން ކުރީގެ ހޯމް މިނިސްޓަރު އުމަރު ނަސީރު ވިދާޅުވީ 2028 ވަނަ އަހަރުގެ ރިޔާސީ އިންތިހާބުގައި ވާދަކުރަށްވާނެ ކަމަށާއި އެ އިންތިހާބު ކާމިޔާބު ކުރެވޭނެ ކަމުގެ ޔަގީންކަން އެބައޮތް ކަމަށެވެ. އަދި އިންތިހާބުގައި ވާދަކުރައްވާނީ މިނިވަން ކެންޑިޑޭޓެއްގެ ގޮތުގައި ކަމަށާއި އިންތިހާބު ކާމިޔާބުކުރައްވައި ވެރިކަަމަށް ވަޑައިގެން ގައުމަށް ބޮޑު ބަދަލެއް ގެންނަވާނެ ކަމަށް އުމަރު ވިދާޅުވިއެވެ.

"2028 ވަނަ އަހަރަކީ އަޅުގަނޑު ދެކޭގޮތުގައި އަޅުގަނޑު ކާމިޔާބުކުރާނެ އަހަރު، އަދި އަޅުގަނޑު މުޅި ގައުމު އެއްކޮށް ބަދަލުކޮށްލުމުގެ ވަރަށް ބޮޑު ރެވޮލިއުޝަރީ ފެށުމަކަށް ވާނެ އަހަރު،" މީގެ ކުރިން ދެ ފަހަރެއްގެ މަތިން އިންތިހާބުގައި ވާދަކުރެއްވި އުމަރު ވިދާޅުވިއެވެ.

މީގެ އިތުރުން އުމަރު ވިދާޅުވީ ދިވެހި ރައްޔިތުން މިހާރު ދަނީ ސިޔާސީ ޕާޓީތައް ދަސްކުރަމުން ކަމަށެވެ. 2028 ވަނަ އަހަރު އިންތިހާބު އަންނަންވާއިރަށް ރައްޔިތުންނަށް ޕާޓީތައް ވަރަށް ބޮޑަށް ދަސްވެ ޕާޓީތަކުން ކަންތައް ކުރާ ގޮތް އެނގޭނެ ކަމަށް އުމަރު ވިދާޅުވިއެވެ.

އުމަރު ވިދާޅުވީ، ބޮޑެތި ސިޔާސީ ޕާޓީތައް ފެއިލްކޮށްލައި އެހެން މިނިވަން ކެންޑިޑޭޓުން ދުނިޔޭގެ ގައުމުތަކުގައި ވެރިކަމަށް ގެންނަމުންދާ ކަމަށެވެ. އޭގެ ބައެއް މިސާލުތައް ދައްކަވަމުން އުމަރު ވިދާޅުވީ ރައްޔިތުން މިހާރު ބަލަނީ ސިޔާސީ ޕާޓީއަށް ނޫން ކަމަށާ ރައްޔިތުން ބަލަނީ ތެދުވެރިކަމާއި އަމާނަތްތެރިކަމާއި ވިޝަން ހުރި ލީޑަރަކަށް ކަމަށެވެ. އަދި 2028 ވަނަ އަހަރު އިންތިހާބުގައި ރައްޔިތުން ވޯޓްދޭއިރު ޕާޓީއަަކަށް ނުބަލާނެ ކަމަށާއި އެކަން ފެނިގެންދާނެ ކަމަށް އުމަރު ވިދާޅުވިއެވެ.

"ޕާކިސްތާނަށް ބައްލަވާ އިމްރާން ޚާން އެގައުމުގެ އެންމެ ބޮޑު ދެ ޕާޓީ ބަލިކޮށްފައި ވެރިކަމަށް އައީ، މެކްރޮން ފްރާންސްގައި އެގަައުމުގެ އެންމެ ބޮޑު ތިން ޕާޓީ ބަލިކޮށްފައި އައީ އެންމެ ފަހުން ދާދި އިހަކަށް ދުވަހު ސްރީލަންކާގެ އެންމެ ބޮޑު ދެ ޕާޓީ ބަލިކޮށްފައި އެއައީ ވަރަށް އާދައިގެ ކެންޑިޑޭޓަކު، އެހެންވީމާ މިއަދު ޕޮލިޓިކްސް ޑިޓާމައިން ކުރަނީ އޮނެސްޓީގައި މިހާރު، ތެދުވެރިކަމާއި އަމާންތެރިކަމާއި ވިޝަންހުރީ ކާކުގެތޯ ބަލަނީ، ޕާޓީގައި ހުރިތޯ ނުބަލާނެ ދެނެއް،" އުމަރު ވިދާޅުވިއެވެ.