އަމިއްލަ ގޭގޭގައި ބޮންޑެޑް ވެއާހައުސްތައް ހިންގޭ ގޮތަށް އޮތް އޮތުން ބަދަލުކޮށް، މީގެ ފަހުން އެފަދަ ގުދަންތައް ހިންގޭނީ ކަސްޓަމްސްގެ ފުރިހަމަ ކޮންޓްރޯލް އޮންނަ ސަރަހައްދުތަކުގައި އެކަނި ކަމުގައި ސަރުކާރުން ކަނޑައަޅައިފިއެވެ.

ސަރުކާރުގެ މި ނިންމުން ހާމަކުރެއްވީ ހޯމް ލޭންޑް ސެކިއުރިޓީ މިނިސްޓަރު އަލީ އިހުސާނެވެ. މާލޭގެ ގެއެއްގައި ހުރި ބޮންޑެޑް ވެއާހައުސްއަކުން ގިނަ އަދަދެއްގެ ސިނގިރޭޓު ގެއްލުނު މައްސަލައަކަށް އިޝާރަތް ކުރަށްވައި ހޯމްލޭންޑް ސެކިއުރިޓީ މިނިސްޓަރު އަލީ އިހުސާން އެކްސްގައި ކުރެއްވި ޕޯސްޓެއްގައި ވިދާޅުވީ، ބޮންޑެޑް ވެއާހައުސް ގުދަންތައް މީގެ ފަހުން ހިންގޭނީ ކަސްޓަމްސްގެ ފުރިހަމަ ކޮންޓްރޯލް އޮންނަ ސަރަހައްދުތަކުގައި އެކަނި ކަމަށެވެ.

އަމިއްލަ ގޭގޭގައި ބޮންޑެޑް ވެއާހައުސްތައް ހިންގޭ ގޮތަށް ކުރިން އޮތްގޮތަކީ ސަލާމަތީ ގޮތުންނާއި ކޮންޓްރޯލް ކުރުމުގެ ގޮތުން ވިސްނިޔަސް އެންމެ ރަނގަޅު ގޮތް ނޫން ކަމަށް މިނިސްޓަރު އިހުސާން ވިދާޅުވިއެވެ.

"ސަރުކާރުން ވަނީ ބޮންޑެޑް ވެއާހައުސް ދެން ހިންގޭނީ ހަމައެކަނި ކަސްޓަމްސްގެ ފުލް ކޮންޓްރޯލް އޮންނަ ސަރަހައްދުތަކުގަ އެކަނި ކަމަށް ކަނޑައަޅާ އެ ސިޔާސަތު ތަންފީޒު ކުރަން ފަށާފަ،" އިހުސާންގެ ޕޯސްޓުގައިވެ އެވެ.

މީގެ ކުރިން އަމިއްލަ މީހުންގެ ގެތަކުގައި ހުންނަ މިފަދަ ގުދަންތައް ހިންގަނީ ވެރިފަރާތަށް އަދި ކަސްޓަމްސްއަށް ވަކި ދެ ތަޅެއް ހަރުކޮށް، ކަސްޓަމްސްގެ ހުއްދަނެތި ނޫނީ ނުހުޅުވޭ ގޮތަށް ކަމަށްވާއިރު މިނިސްޓަރު އިހުސާން އިތުރަށް ވިދާޅުވެފައިވަނީ މިއީވެސް އެ އުސޫލުން ހިންގި ގުދަނެއް ކަމަށާއި ސިނގިރޭޓު ގެއްލުނު މައްސަލަ ފުލުހުން ބަލަމުންދާ ކަމަށެވެ. އަދި ގެއްލުނު މުދަލަށް ޑިއުޓީ ދެއްކުމަށް ވެރިފަރާތަށް އެންގިފައިވާކަމަށްވެސް އިހުސާން ވިދާޅުވި އެވެ.

މާލޭގެ ގެއެއްގައި ހުރި މިފަދަ ބޮންޑެޑް ވެއާހައުސް އަކުން ގާތްގަނޑަކަށް 34،500 ސިނގިރޭޓު ކާޓޫނު ގެއްލިފައިވާ ކަމަށް އެ ޚަބަރު ރިޕޯޓްކުރި މީޑިޔާ އިން ވަނީ ބުނެފައެވެ.