ބޭސް ޖަހައިގެން ހައްދާފައިހުރި ކެބެޖު ކައިގެން އަންހެން ކުއްޖަކު މަރުވެއްޖެއެވެ.

އިންޑިއާގެ ސްރީ ނަގަރުގައި ހިނގައިދިޔަ މި ހާދިސާގައި މަރުވެފައިވަނީ އުމުރުން 14 އަހަރުގެ އަންހެން ކުއްޖެކެވެ. އީޓައިމްސްގައިވާ ރިޕޯޓެއްގަައި ބުނެފައިވަނީ އެކުއްޖާ މަރުވީ، އެކުއްޖާގެ އަމިއްލަ އާއިލާއިން ހައްދާފައިވާ ކެބެޖު ކައިގެން ކަމަށެވެ.

މިމަހު 25 ގައި އެ އަންހެން ކުއްޖާގެ ބައްޕަ ވަނީ އެކުއްޖާ މަރުވި ހަަދިޘާއާ ގުޅިގެން ފުލުހަށް މައްސަލަ ހުށަހަޅާފައެވެ. އެގޮތުން ފުލުހުން ހޯދި ހޯދުމުން އެނގިފައިވަނީ އެކުއްޖާ މަރުވީ އެކުއްޖާގެ ގޭގައި ހައްދާފައިވާ ކެބެޖު ކައިގެން ކަމަށެވެ. މި ކެބެޖަށް އެކުއްޖާގެ ބޮޑުބޭބެ ހުރީ ޕެސްޓިސައިޑު (އެކިކަހަލަ ސޫފިތަކުން ގަސްތައް ރައްކާތެރިކުރަން ޖަހާ ބޭސް) ޖަހާފައި ކަމަށް ރިޕޯޓުތައް ބުނެއެވެ.

ރިޕޯޓުތައް ބުނާ ގޮތުގައި އެކުއްޖާ އެ ކެބެޖު ކައިފައި ވަނީ އެއަށް ޕެސްޓިސައިޑު ޖަހާފައިވާކަން ނޭނގި އެވެ. މި ހާދިސާ ހިނގާފައިވަނީ މިމަހުގެ 18 ގައެވެ. އަދި އެ ކެބެޖު ފަތް ކެއުމުން އެކުއްޖާގެ ހާލު ދެރަވެ ހޮސްޕިޓަލުގައި ފަރުވާ ދީފައިވާ ކަމަށް ރިޕޯޓިތައް ބުނެއެވެ. ހޮސްޕިޓަލުގައި ފަރުވާ ދެމުންދަނިކޮށް އެކުއްޖާ މަރުވެފައިވަނީ މިމަހު 24 ގައެވެ.

ކެބެޖަކީ ހަށިގަނޑަށް ބޭނުންވާ އެތައް ނިއުޓްރިއެންޓުތަކެއް ހިމެނޭ އެއްޗެއް ކަމުގައި ވީނަމަވެސް މި އެއްޗެހި ހައްދާއިރު ބޭނުންކުރާ ބައެއް ޕެސްޓިސައިޑުތަކަކީ މީހާގެ ފުރާނައަށް ވަރަށް ނުރައްކާތެރި މާއްދާތަކެކެވެ. ވީމާ ތަރުކާރީ އާއި މޭވާގެ ބާވަތްތައް، އަދި ހާއްސަކޮށް ފަތުގެ ބާވަތްތައް ބޭނުން ކުރާއިރު ރަނގަޅަށް ދޮވެގެން ބޭނުން ކުރުމަށް ކޮންމެ މީހަކުވެސް ސަމާލުވާން ޖެހެއެވެ.