އެހެން އަހަރުތަކެކޭ އެއްގޮތަށް މި އަހަރުވެސް ރާއްޖެއަށް ފަތުރުވެރިން އެންމެ ގިނައިން ޒިޔާރަތް ކުރާ ސީޒަނާއި ދިމާކޮށް އައި ދެވަނަ ކްރޫޒް ލައިނާ، 1،872 ފަތުރުވެރިންނާއެކު މާލެއަށް ބަނދަރުކޮށްފިއެވެ.

މި ސީޒަންގައި މިހާތަނަށް ރާއްޖެއަށް އައި ދެ ކްރޫޒް ލައިނާ އަކީ ބަހާމާސްގައި ރަޖިސްޓްރީކޮށްފައިވާ "އެމްއެސް ނޯވެޖިއަން ސްކައި" އަދި މާޝަލް އައިލެންޑްސްގައި ރަޖިސްޓްރީކޮށްފައިވާ "އެމްއެސް ރިވިއޭރާ"' އެވެ. މި ދެ ކްރޫޒް ލައިނާވެސް މާލޭގައި ވަނީ ބަނދަރުކޮށްފަ އެވެ.

މި ދެ ކްރޫޒް ލައިނާގެ ތެރެއިން އެމްއެސް ނޮވެޖިއަން ސީޝެލްސްގައި ބަނދަރު ކުރުމަށްފަހު ރާއްޖެ އައިސްފައިވާ އިރު އެ ކްރޫޒް ލައިނާރ އިން 1،872 ފަތުރުވެރިން ރާއްޖެ އައިސްފައިވެ އެވެ. މި ބޯޓު މިރޭ މާލެއިން ފުރާނެއެވެ.

2004 މީހުންގެ ޖާގައިގެ އެމްއެސް ރިވިއޭރާ އިންވެސް އެތައް ސަތޭކަ ފަތުރުވެރިންނެއް މާލެ ފައިބާފައިވާ އިރު މި ކްރޫޒް ލައިނާ މާލެއިން ފުރަން ތާވަލުކޮށްފައިވަނީ މާދަމާ އެވެ.

މި އަހަރަކީ ރާއްޖެއަށް ރިކޯޑު އަދަދަކަށް ފަތުރުވެރިން ޒިޔާރަތް ކުރި އަހަރެއްކަންވެސް ފާހަގަ ކުރެވެއެވެ. އެގޮތުން މިއަހަރު ސަރުކާރުން އަންދާޒާ ކުރި، ދެ މިލިއަން ފަތުރުވެރިންނަށްވުރެ އިތުރަށް މިހާރުވެސް ވަނީ ރާއްޖެއަށް ޒިޔާރަތް ކޮށްފައެވެ.