2024 ވަނަ އަހަރު ކޮންމެ ދުވަހަކު މެރެތަންގައި ދުވި ބެލްޖިއަމްގެ އަންހެނަކު ދުނިޔޭގެ ރެކޯޑު ފޮތުން ޖާގަ ހޯދައިފިއެވެ.

ހިލްޑޭ ޑޮސޮގްނޭ ނަމަކަށް ކިޔާ އުމުރުން 55 އަހަރުގެ މި އަންހެންމީހާ ވަނީ ފާއިތުވި އަހަރުގެ ކޮންމެ ދުވަހަކު މެރެތަންގައި ދުވެ ދުނިޔޭގައި ފުރަތަމަ ފަހަރަށް އަހަރެއްގެ ހުރިހާ ދުވަހަކު މެރެތަންގައި ދުވި އަންހެންމީހާގެ ގޮތުގައި ދުނިޔޭގެ ރެކޯޑް ފޮތުން ޖާގަހޯދާފައެވެ.

ވަރުބަލިވި ނަމަވެސް ކެތްތެރިކަމާއެކު މެރެތަންތައް ނިންމި ޑޮސޮގްނޭ ވަނީ ފިނީގައާއި، ގަދަ އަވީގައިވެސް، އެކަނި އަދި އެތައް ބަޔަކާއެކުވެސް މެރެތަންތައް ނިންމާފައެވެ.

"އަހަރެން އުފާވޭ އެކަން ނިމުނީމަ،" އަންގާރަ ދުވަހު އެންމެ ފަހަށް ބައިވެރިވި މެރެތަންގެ ލައިން ހުރަސް ކުރުމަށް ފަހު ބޭރުގެ މީޑިޔާއަކަށް ދިން އިންޓަވިއުގައި އޭނާ ބުންޏެވެ.

އެންމެ އަހަރެއްގެ ތެރޭގައި 15،444 ކިލޯމީޓަރު (9،596 މޭލު) ދުވުމުގައި ޑޮސޮގްނޭ ވަނީ ހޭދަކޮށްފައެވެ. އޭނާ އެކަން ކުރީ އުރަމަތީގެ ކެންސަރުގެ ދިރާސާތަކަށް ފައިސާ ހޯދުމަށް ކަމަށްވެސް ވަނީ ބުނެފައެވެ. އަދި މެރެތަންގައި ދުވެގެން މިހާތަނަށް ގާތްގަނޑަކަށް 60،000 ޔޫރޯ (62،438 ޑޮލަރު) ފައިސާ ހޯދާފައިވާ ކަމަށް ޑޮސޮގްނޭ ވަނީ ބުނެފައެވެ.

ޑޮސޮގްނޭ މިހާރު އަންނަނީ ގިނިސް ވޯލްޑް ރެކޯޑްސް ޖަމިއްޔާގެ ޝަރުތުތައް ފުރިހަމަ ކުރުމަށް ކޮންމެ ދުވަހަކު އޭނާ މެރެތަންގައި ދުވިކަން ސާބިތުކުރުމަށް އޭނާ އެއްކުރި ޖީޕީއެސް ޑޭޓާއާއި ފޮޓޯ އަދި ވީޑިއޯ ހެކިތައް ފައިލް ކުރަމުންނެވެ. އަދި މި ހެކިތަކުން އޭނާ ކާމިޔާބު ވެއްޖެނަމަ ގާތްގަނޑަކަށް ތިން މަސް ދުވަހުގެ ތެރޭގައި ރަސްމީކޮށް އެ ރެކޯޑް އޭނާއަށް ލިބޭނެއެވެ.