ރާއްޖެ އިން ޗައިނާއާ އެކުގައި ސޮއިކުރި ފްރީ ޓްރޭޑް އެގްރީމަންޓް (އެފްޓީއޭ) އަށް އަމަލުކުރަން މިއަދު ފަށާފައިވާތީ މިއަދުން ފެށިގެން ޗައިނާއިން ރާއްޖެއަށް އެތެރެކުރާ މުދަލުގެ 91 އިންސައްތަ ބާވަތުން ޑިއުޓީ ދައްކަން ނުޖެހޭ އުސޫލަށް އަމަލުކުރަން ފަށައިފި އެވެ.

ދުނިޔޭގެ ވަރުގަދަ އެއް ބާރު ކަމަށްވާ ޗައިނާއާ އެކު ރާއްޖެއިން ގާއިމުކުރި އެފްޓީއޭ އާއި އެންމެ ފަހުން ސޮއިކުރި ފަހުމުނާމާއާ އެކުގައި ރާއްޖެއަށް ވަރަށް ބޮޑެތި ފައިދާތަކެއް ކުރާނެއެވެ. މިގޮތުން ޗައިނާއިން ރާއްޖެއަށް އެތެރެކުރާ މުދަލުގެ ބޮޑު އިންސައްތައަކުން ޑިއުޓީ ދައްކަން ނުޖެހޭއިރު، ޑިއުޓީ ނުދައްކައި، ދިވެހި ރުފިޔާއިން ޗައިނާ އިން މުދާ ގަނެވޭނެއެވެ.

ދިވެހި ވިޔަފާރިތަކަށް އެންމެ ގިނައިން މުދާ ގަންނަ އެއް ގައުމުގެ ގޮތުގައި ޗައިނާ ހިމެނޭއިރު މި އެއްބަސްވުމުގެ ސަބަބުން ވިޔަފާރިތަކަށް ވަރަށް ބޮޑު ލުޔެއް ލިބޭނެ އެވެ. ސަރުކާރުން މީގެ ކުރިން ބުނީ މި އެއްބަސްވުމަށް އަމަލު ކުރަން ފެށުމާއެކު ނުވަ ސެކްޓަރެއްގެ ޖުމުލަ 7897 އައިޓަމަކުން ޑިއުޓީ އުނިވެގެންދާނެ ކަމަށެވެ.

ރައީސް ޑރ. މުއިއްޒުގެ ސަރުކާރުން ދަނީ ވިޔަފާރީގެ ދާއިރާއަށް ލުއިފަސޭހަތައް ގެނައުމަށްޓަކައި، ރާއްޖެއާއެކު ވިޔަފާރީގެ މުއާމަލާތްތައް ގިނަ އަދަދަކަށް ހިންގާ ބޮޑެތި މާކެޓްތަކާއެކު މިފަދަ ކަރަންސީ ސެޓްލްމަންޓް އެރޭންޖްމަންޓްތައްް ހެދުމަށް އިސްކަން ދެމުންކަން ފާހަގަ ކުރެވެއެވެ.