ރައްޔިތުން މާޔޫސް ނުވެ އަމާން މާދަމައެއް ހޯދަން މަސައްކަތް ކުރަންޖެހޭކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.

މީލާދީ އާއަހަރާއި ގުޅިގެން ނެރުއްވި ވީޑިއޯ މެސެޖެއްގައި އެމްޑީޕީގެ ރައީސް އަބުދުﷲ ޝާހިދު ވިދާޅުވީ މިދިޔަ އަހަރަކީ ރައްޔިތުންނަށް ގިނަ ގޮންޖެހުންތަކެއް ކުރިމަތިވި އަހަރެއް ކަމަށެވެ. އެގޮތުން އިޖްތިމާއީ ރައްކާތެރިކަމުގެ މުޅި ނިޒާމު ރޫޅިގެން ގޮސްފައިވާ ކަމަށް ޝާހިދު ވިދާޅުވިއެވެ. އޭނާ ވިދާޅުވީ އިގްތިސާދީ ހަރަކާތްތަކަށް ހުރަސްއެޅުމާއި، އަސާސީ ހައްގުތައް ކަށަވަރުކުރުމުގައި ދިމާވި ދަތިތަކުގެ ސަބަބުން ރައްޔިތުން ވަނީ ނިކަމެތިކަމާއި ހާސްކަމުގައި އުޅެން ޖެހިފައި ކަމަށެވެ.

މީގެ އިތުރުން ޝާހިދު ވިދާޅުވީ އާ އަހަރާ ގުޅިގެން ރައްޔިތުން މާޔޫސްކަމުގައި ކަސްތޮޅު އެޅުވިގެން ތިބެގެން ނުވާނެ ކަމަށެވެ. ޝާހިދު ވިދާޅުވީ އާއަހަރަކާއި ކުރިމަތިލާންޖެހޭނީ އާ ހިތްވަރާއެކު ކަމަށެވެ. އަދި ރައްޔިތުންނަށް އަމާން މާދަމާއެއް ހޯދުމަށް އާ ހިތްވަރަކާއެކު މަސައްކަތް ކުރަން ޖެހޭ ކަމަށް ޝާހިދު ވިދާޅުވިއެވެ.