ރާއްޖެއަށް މިހާރު ކުރަމުންދާ ވިއްސާރައިގައި ބޯކޮށް ވާރޭވެހުމާއި އުދަ އެރުމުގެ ސަބަބުން 6 ރަށެއްގައި ފެންބޮޑުވެފައިވާ ކަމުގެ ރިޕޯޓް ލިބިފައިވާ ކަމަށް ނޭޝަނަލް ޑިޒާސްޓާ މެނޭޖްމަންޓު އޮތޯރިޓީ (އެންޑީއެމްއޭ)އިން ބުނެފިއެވެ.

ނޭޝަނަލް ޑިޒާސްޓާ މެނޭޖްމަންޓު އޮތޯރިޓީން ބުނީ މިއަދު އުދަ އަރާފައިވަނީ ށ. ނަރުދޫ އަދި ރ. އިނގުރައިދޫ އަށް ކަމަށެވެ. އަދި ވާރޭ ވެހި ފެންބޮޑުވެފައިވަނީ ދ. ކުޑަހުވަދޫ، ދ. މީދޫ، ފ. ނިލަންދޫ އަދި ފ. މަގޫދޫ އަށް ކަމަށް އެންޑީއެމްއޭ އިން މައުލޫމާތުދެ އެވެ.

އެންޑީއެމްއޭ އިން ބުނީ ބައެއް ރަށްރަށުގައި ފެން ހިއްކުމުގެ މަސައްކަތުގައި ސިފައިން ހަރަކާތްތެރިވަމުންދާ ކަމަށެވެ. އަދި ފެން ބޮޑުވުމުގެ އެއްވެސް ހާދިސާއެއްގައި ބޯހިޔާވަހިކަން ގެއްލި އިންސާނީ އެހީތެރިކަން ފޯރުކޮށްދޭން ޖެހިފައި ނުވާ ކަމަށް އެންޑީއެމްއޭ އިން ބުންޏެވެ.

މޫސުމާއި ބެހޭ ގައުމީ އިދާރާ އިން ބުނާގޮތުން ރާއްޖެ އަށް މޫސުން ގޯސްވެފައި ވަނީ ސްރީ ލަންކާގެ އިރުދެކުނުގައި އުފެދިފައިވާ ކޮޅިގަނޑާއި، އެ ކޮޅިގަނޑާއި ގުޅިފައިވާ ލޯ ޕްރެޝާ ޓްރަފުގެ ސަބަބުންނެވެ.