ރާއްޖެ އަށް މިހާރު ކުރަމުންދާ ވިއްސާރައިގައި މިހާތަނަށް އެންމެ ބޮޑު ގެއްލުމެއް ލިބިފައި ވަނީ ފ. ނިލަންދު އާއި ކ. ހިންމަފުއްޓަށް ކަމަށް ނެޝަނަލް ޑިޒާސްޓަ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފި އެވެ.

ނެޝަނަލް ޑިޒާސްޓަ މެނޭޖްމަންޓް އޮތޯރިޓީ (އެންޑީއެމްއޭ) އިން މިރޭ ބުނީ ރާއްޖެ އަށް މިިހާރު ކުރަމުންދާ ވިއްސާރައިގައި ނިލަންދޫގެ 80 ޕަސެންޓް ފެންބޮޑުވި ކަމަށެވެ. އަދި ހިންމަފުށީގައި 60 ޕަސެންޓަށް ފެންބޮޑުވި ކަމުގެ ރިޕޯޓް ލިބިފައިވާ ކަމަށް އެންޑީއެމްއޭ އިން ބުނެއެވެ.

ފ. ނިލަންދޫ އަށް އިއްޔެ ހެނދުނު 6:00 އިން މެންދުރު ފަހު 2:00 އާ ހަމައަށް މެދުނުކެނޑި ބޯކޮށް ވާރޭވެހުމާއި ގުޅިގެން އެރަށުގެ މަގުތަކުގައި ވަރަށް ބޮޑަށް ފެންބޮޑުވެ ގެތަކަށް ފެންވަދެ ހިފާގެންގުޅޭ އެއްޗެއްސަށް ވަނީ ގެއްލުންވެފައެވެ. އެ ރަށުގެ ބޮޑު ބައެއްގައި ފެން ބޮޑުވުމާއި ގުޅިގެން ފުލުހުންނާއި އާންމު ރައްޔިތުން ކުރި މަސައްކަތުން އެރަށުގެ ހާލަތު މިހާރު ވަނީ އާއްމު ހާލަތަކަށް ގެނެވިފައެވެ. މިއީ މިފަހުން ކުރި ވިއްސާރައިގައި ނިލަންދޫ އަށް އެންމެ ބޮޑު ގެއްލުމެއް ލިބުނު ފަހަރު ކަން ފާހަގަކުރެވެއެެވެ.

ވިއްސާރައިގައި ދެވަނަ އަށް އެންމެ ބޮޑަށް ގެއްލުމެއް ލިބުނު ހިންމަފުށީގައި ބޮޑުވެފައިވާ ފެންގަނޑު އަދިވެސް ނުހިދެއެވެ. އެރަށުގައި ބޮޑުވެފައިވާ ފެންގަނޑު ހިއްކުމުގެ މަސައްކަތް ފުލުހުންނާއި ރައްޔިތުންނާއި ކަމާގުޅޭ މުވައްސަސާތަކުން އަންނަނީ ކުރަމުންނެވެ.

އެންޑީއެމްއޭއިން މީގެ ކުރިން ބުނީ އުދަ އަރައިގެން ދެ ރަށަކުން ރިޕޯޓް ލިބިފައިވާ ކަމަށާއި އެއީ ށ. ނަރުދޫ އަދި ރ. އިނގުރައިދު ކަމަށެވެ.

އެންޑީއެމްއޭއިން ބުނީ ފެންބޮޑުވެގެން ރިޕޯޓުކޮށްފައިވަނީ ނިލަންދޫގެ އިތުރުން މަގޫދު އާއި ފީއައްޔާއި ކ. ގުރައިދު އާއި ހިންމަފުއްޓާއި އދ. މާމިގިއްޔާއި ދ. ކުޑަހުވަދޫގެ އިތުރުން މީދޫ ކަމަށެވެ. އެ ރަށްރަށުގައި ވެސް ގޭގެއަށް ފެން ވަދެ ގެއްލުންތައް ލިބިފައިވާ ކަމަށް އެންޑީއެމްއޭއިން މައުލޫމާތުދެއެވެ.