ރާއްޖެއަށް މިހާރު ކުރަމުންދާ ގަދަ ވިއްސާރާގައި ވެރިރަށް މާލެއަށް ލިބުނު ގެއްލުމުގެ ސަބަބުން 36 ގޭބިސީއެއްގެ 226 މީހުންނަށް ވަގުތީ ބޯހިޔާވަހިކަމާއި ކެއިން ބުއިން ފޯރުކޮށްދީފައިވާ ކަމަށް ނޭޝަނަލް ޑިޒާސްޓާ މެނޭޖްމެންޓް (އެންޑީއެމްއޭ) އިން ހާމަކޮށްފި އެވެ.

އިއްޔެ ހެނދުނުން ފަށައިގެން ކުރި ވިއްސާރައިގައި މާލޭގެ މަގުތަކުގައި ވަރަށް ބޮޑަށް ފެންބޮޑުވެ ގޭގެއަށާއި ވިޔަފާރިކުރާ ތަންތަނަށް ފެންވަދެ، ބޮޑެތި ގެއްލުންތަކެއް ވަނީ ލިބިފައެވެ.

އެންޑީއެމްއޭ އިން ބުނީ މާލޭގައި އިއްޔެ އެކިއެކި އެހީ ހޯދުމަށް 774 ތަނަކުން ރިޕޯޓްކޮށްފައިވާ ކަމަށާއި އޭގެތެރެއިން 554 ކޯލަކީ ވެލި ބަސްތާ ޖެހުމަށް އައި ކޯލުތައް ކަމަށެވެ. ވެލި ބަސްތާ ޖަހައިދިނުމުގެ މަސައްކަތް ކޮށްފައިވަނީ މާލެ ސިޓީ ކައުންސިލާއި ފުލުހުންނާއި ސިފައިންގެ އިތުރުން ލޯކަލް ގަވަމެންޓް މިނިސްޓްރީންނެވެ. މާލެއަށް ލިބުނު ގެއްލުމުގެ ސަބަބުން 36 ގޭބިސީއެއްގެ 226 މީހުންނަށް ވަގުތީ ބޯހިޔާވަހިކަމާއި ކެއިން ބުއިން ފޯރުކޮށްދީފައިވާ ކަމަށް އެންޑީއެމްއޭ އިން ބުންޏެވެ.

އެންޑީއެމްއޭ އިން މައުލޫމާތު ދޭގޮތުގައި މާލޭން ޒަރޫރީ ބޭނުންތަކަށް ހުރަސް އެޅިގެން 53 ގެއަކުން ރިޕޯޓްކޮށްފައިވާ ކަމަށެވެ. އަދި އެތަންތަނުގެ ރެޕިޑް އެސެސްމެންޓް ހަދައި ނިމިފައިވާއިރު އޭގެ ތެރެއިން އާންމު ދިރިއުޅުމަށް ހުރަސް އެޅޭ ހާލަތުގައި ހުރީ 36 ގޭބިސީ ކަމަށް އެންޑީއެމްއޭ އިން ބުނެއެވެ.

މީގެ އިތުރުން ބޯކޮށް ވާރޭ ވެހި ފެންބޮޑުވުމުގެ ސަބަބުންނާއި އުދަ އެރުމުގެ ރާއްޖޭގެ އެކި ރަށްރަށައް ވެސް ވަނީ އެކިވަރުގެ ގެއްލުން ލިބިފައެވެ.