މި ސަރުކާރަކީ ރައްޔިތުންގެ ފުދުންތެރިކަމަށް ވަރަށް ބޮޑަށް ވިސްނާ ސަރުކާރެއް ކަމަށް ރައްޔިތުންގެ މަޖިލީހުގެ ހުރާ ދާއިރާގެ މެންބަރު ޑރ. އަނާރާ ނަޢީމް ވިދާޅުވެއްޖެއެވެ.

މެންބަރު އަނާރާ މިފަދައިން ވިދާޅުވީ، ރައީސް ޑރ. މުޙައްމަދު މުޢިއްޒު ކ. ގުޅީ ރައްޔިތުންނާއި ބައްދަލުކުރެއްވުމަށް ބޭއްވި ޖަލްސާގައި ވާހަކަ ދައްކަވަމުންނެވެ. މިޖަލްސާގައި ހުރާ ދާއިރާގެ މެންބަރު ޑރ. އަނާރާ ނަޢީމް ވިދާޅުވީ، މި ސަރުކާރަކީ ރައްޔިތުން އުފާ ފާގަތި ކަމަށް މަސައްކަތް ކުރާ ސަރުކާރެއް ކަމަށެވެ.

އެގޮތުން ރައްޔިތުންގެ ފުދުންތެރިކަމަށް މި ސަރުކާރުން ވަރަށް ބޮޑަށް ވިސްނާ ކަމަށް އަނާރާ ވިދާޅުވިއެވެ. މެމްބަރު އަނާރާ ވިދާޅުވީ ސަރުކާރަށް މިވީ އަހަރެއްހާ ދުވަހުގެ ތެރޭގައި ފެނިގެންދިޔައީ، ރައްޔިތުންގެ އިޙްސާސްތައް ދަނެގެން، ރައްޔިތުންގެ އަޑުއަހައި ރައްޔިތުންނާ ވަަރަށް ގާތުން މަސައްކަތްކުރައްވާ މަންޒަރުކަމަށެވެ. އަދި ރައްޔިތުންނާއި ގުޅުންހުރި ބޮޑެތި މައްސަލަތައް ހައްލުކުރުމަށް ސަރުކާރުން މުހިންމު ފިޔަވަޅުތަކެއް އަޅުއްވަމުން ގެންދަވާކަމަށްވެސް ޑރ. އަނާރާ ވިދާޅުވިއެވެ. އަނާރާ ވިދާޅުވީ ސަރުކާރުން މިހާތަނަށް ނިންމި ކޮންމެ ނިންމުމެއް ވެސް ނިންމާފައިވަނީ ރައްޔިތުންގެ ލާބަޔާ މަންފާ އަށްޓަކައި ކަމަށެވެ.

"ރައްޔިތުން ސަރުކާރަށް އެއްބާރުލުން ދިނުމުގައި ކުރިއަށް ދިޔުން އެއީ އިތުރު މައްސަލަތައް ހައްލުވެ އިތުރު ކުރިއެރުމާއި ތަރައްޤީ ރަށްރަށައް ވެސް ރައްޔިތުންނަށް ވެސް ލިބިގެންދާނެ ކަމެއް ކަން އަޅުގަނޑު ޔަޤީންކުރަން،" އަނާރާ ވިދާޅުވިއެވެ.