ދަރަނި އަދާކުރުމަށް ދައުލަތުން މި އަހަރު 9.4 ބިލިއަން ރުފިޔާ ހޭދަކުރަން ޖެހޭ ކަމަށް މާލީ ވުޒާރާގެ ހިސާބުތަކުން ދައްކައިފިއެވެ.

މާލީ ވުޒާރާގެ ހިސާބުތަކުން ދައްކާގޮތުގައި މިއަހަރު ރާއްޖޭން ދަރަނި އަދާކުރުމަށް 9.4 ބިލިއަން ރުފިޔާ ހޭދަކުރަން ޖެހޭއިރު އަންނަ އަހަރު ދަރަނި ދެއްކުމަށް 15 ބިލިއަން ރުފިޔާ ހޭދަކުރަން ޖެހެއެވެ.

ދަޢުލަތުން ދަރަނި އަދާކުރުމަށް ބޮޑު ހޭދައެއްކުރަން ޖެހިފައިވާއިރު މިދިޔަ އަހަރު ދައުލަތުގެ ޖުމްލަ ދަރަނި ހުރީ 139 ބިލިއަން ރުފިޔާގަ އެވެ. އަދި މި އަހަރު 150 ބިލިއަން ރުފިޔާއަށް އަރާނެ ކަމަށް މާޅީ ވުޒާރާއިން ލަފާ ކޮށްފައިވެއެވެ.

ރާއްޖޭގެ ދަރަނީގެ ޙާލަތު ކަންބޮޑުވާ ދަރަޖައިގައި ހުރިކަމަށްބުނެ ސަރުކާރުން މިދިޔަ އަހަރު ވަނީ ޚަރަދު ކުރުމަށް ޚާއްސަ ފިޔަވަޅުތަކެއްވެސް އަޅާފައެވެ. ނަމަވެސް އެފިޔަވަޅުތަކުގެ ތެރެއިންވެސް ސަރުކާރުން ވަނީ މިދިޔަ އަހަރު 9 ލޯނަކަށް 5.2 ބިލިއަން ރުފިޔާގެ ދަރަނި ރާއްޖޭން ބޭރުގެ އެކި ބޭންކުތަކުން ނަގާފައެވެ.

ދަރަނީގެ ގޮންޖެހުން ބޮޑުވެ ރާއްޖޭގެ އިޤްތިޞާދަށް އޭގެ ނޭދެވޭ އަސަރު ކުރަމުންދާއިރު ރާއްޖޭން އެކި ޤައުމުތަކަށް ދައްކަންޖެހޭ ގާތްގަނޑަކަށް ދޮޅު ބިލިއަން ޑޮލަރުގެ ދަރަނި ރީފައިނޭންސް ކުރުމުގެ މަޝްވަރާތައް ކުރިޔަށް ދާކަމަށް މާލީ ވަޒީރު މޫސާ ޒަމީރު ވަނީ ވިދާޅުވެފައެވެ.

ރާއްޖޭގެ ދަރަނި ރީފައިނޭންސް ކުރުމުގެ މަޝްވަރާތައް ކުރިޔަށްދާކަމަށް ޒަމީރު ވިދާޅުވެފައިވާއިރު އިންޑިއާ އާއި ޗައިނާ އާއި ޔޫއޭއީގެ ދަރަނިތައް ރީ ފައިނޭންސް ކުރުމުގެ މަސައްކަތް ކުރަށްވާ ކަމަށް ރައީސް ޑރ. މުޢިއްޒު މީގެ ކުރިން ވަނީ ވިދާޅުވެފައެވެ.