ނަފްސާނީ ފުރަތަމައެހީ ފޯރުކޮށްދިނުމަށް ހެލްތު މިނިސްޓްރީން އިފްތިތާހުކުރި ހެލްޕްލައިން މެދުވެރިކޮށް މިހާތަނަށް ތިންހާހަށްވުރެ ގިނަ މީހުނަށް އެހީތެރިކަން ފޯރުކޮށްދީފިއެވެ.

އެ މިނިސްޓްރީން ބުނީ، އެ މިނިސްޓްރީން އިފްތިތާހުކުރި 1677 ހެލްޕްލައިން މެދުވެރިކޮށް މިހާތަނަށް 3004 މީހަކަށް ނަފްސާނީ ފުރަތަމަ އެހީ ފޯރުކޮށްދެވިފައިވާ ކަމަށެވެ.

24 ގަޑިއިރު ހިދުމަތް ލިބޭގޮތަށް ފަރުމާކޮށްފައިވާ އެ ހިދުމަތުގެ ބޭނުމެއްކަމަށް ސަރުކާރުން ބުނެފައިވަނީ ދިރިއުޅުމުގައި ދިމާވާ ގޮންޖެހުންތަކުން އަރައިގަތުމަށް އެހީތެރިކަން ބޭނުންވާ ވަގުތު އެ އެހީ ކޮންމެވަގުތަކުވެސް ލިބޭނެ މަގުފަހިކޮށްދިނުމެވެ.

ނަފްސާނީ ސިއްހަތަކީ މި ސަރުކާރުން އެންމެ މުހިންމުކަމެއްދޭ އެއްކަންތައްކަމަށް މީގެ ކުރިން ރައީސް ޑރ. މުޢިއްޒު ވެސް ވަނީ ވިދާޅުވެފައެވެ. ރާއްޖޭގައި ނަފްސާނީ ސިއްހަތަށް ހާއްސަކުރެވިގެން، ބައިނަލްއަގުވަމީ މިންގަނޑުތަކަށް ފެތޭ، ޒަމާނީ ފެންވަރުގެ ނަފްސާނީ ސިއްހަތުގެ ހޮސްޕިޓަލެއް ގާއިމުކުރުމަކީ ރައީސްގެ ރިޔާސީ ވައުދުގެ ތެރޭގައި ވެސް ހިމެނޭ ކަމެކެވެ.