ސިޔާސީގޮތުން އަނިޔާވެރިވުމުގެ ގޮތުން އެއްވެސް މީހަކު އެކަހެރިކުރުމަކީ ކުރައްވާނެ ކަމެއް ނޫން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ މިހާރު ހއ. ގެ ބައެއް ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން އެ އަތޮޅުގެ ދިއްދޫގެ ރައްޔިތުންނާ މިރޭ ބައްދަލުކުރައްވައި ދެއްކެވި ވާހަކަފުޅުގައެވެ. ރައީސް ޑރ. މުޙައްމަދު މުޢިއްޒު ވިދާޅުވީ ސިޔާސީ ގޮތުން ބަދަލު ހިފުމުގެ ރޫޙެއް ނުގެންގުޅުއްވާނެ ކަމަށެވެ.

ރައީސް ވިދާޅުވީ އެމަނިކުފާނު އަބަދުވެސް ބޭނުންފުޅުވީ ޤައުމުގައި ސިޔާސީ ހަމަޖެހުން އޮތުމަށް ކަމަށެވެ. އަދި ކުރީ ސަރުކާރުތަކުގައި ސިޔާސީގޮތުން އަދަބު ދިންނަމަވެސް މި ސަރުކާރުގައި މިހާތަނަށް އެއްވެސް މީހަކަށް ސިޔާސީގޮތުން އަދަބު ދެއްވާފައި ނުވާނެ ކަމަށް ރައީސް ވިިދާޅުވިއެވެ. ރައީސް ވިދާޅުވީ ސިޔާސީގޮތުން އަނިޔާވެރިވެ އެކަހެރި ކުރުމަކީ އެމަނިކުފާނު ގެންގުޅުއްވާ ސިޔާސަތެއް ނޫން ކަމަށެވެ.

"ސިޔާސީ ގޮތުން އަނިޔާވެރިވެ އެކަހެރިކޮށް ބަންދުކޮށް ހެދުމަކީ އަޅުގަނޑުގެ ކިބައިން ފެންނާނެ ކަމެއް ނޫން، މިހާތަނަށްވެސް ފެނިފައެއް ނޯންނާނެ، އަދި ކުރިއަށް އޮތްތާގައި ވެސް ނުފެންނާނެ." ރައީސް ވިދާޅުވިއެެވެ.

މީގެ އިތުރުން ރައީސް މުޢިއްޒު މިރޭ ވިދާޅުވީ ސިޔާސީގޮތުން ޚިޔާލުތަފާތުވުމަކީ އަނެކާ ނިކަމެތިކޮށްލާ ކުޑައިމީސްކޮށްގެންވާނެ ކަމެއް ނޫން ކަމަށެވެ. އަދި ޤައުމަށް ކުރިއެރުން އަންނާނީ އެންމެން ގުޅިގެން ރިވެތި އަޚްލާގާއެކު ޤައުމީ ވިސްނުމެއްގައި މަސައްކަތް ކޮށްގެން ކަމަށް އެމަނިކުފާނު ވިދާޅުވިއެވެ.

ރައީސް ވިދާޅުވީ ޤާނޫނަކުން މަނާނުވާ ކޮންމެ ކަމެއް ކުރުމުގެ ޙައްގު ރައްޔިތުންނަށް އޮންނާނެ ކަމަށެވެ. އެގޮތުން މި ސަރުކާރުން ޤާނޫނުން ބޭރުން އެއްވެސް ކަމެއް ނުކުރައްވާނެ ކަމަށް ރައީސް މުޢިއްޒު ވިދާޅުވިއެވެ.