މާލޭގައި ބިދޭސީއަކަށް ވަޅިން ބިރު ދައްކައިގެން ފޭރުނު މައްސަލައެއްގައި ފުލުހުން ރޭ ދެ މީހަކު ހައްޔަރުކޮށްފިއެވެ.

މިހާދިސާ ހިނގާފައިވަނީ ގުލާބީމަގުގައި ހުންނަ އަލްބިޔާ މާރޓް ކައިރީގައި ރޭ 02:00 އެހާކަންހާއިރުއެވެ. "ރަސް އޮންލައިން" އަށް މައުލޫމާތު ދެމުން މަންޒަރު ދުށް މީހަކު ބުނީ ގުލާބީމަގުގައި ހުންނަ އަލްބިޔާ މާރޓް ކައިރީގައި ބިދޭސީއަކަށް ވަޅިން ބިރު ދައްކައިގެން ފޭރެން އުޅެނިކޮށް ހައްޔަރުކޮށްފައިވަނީ ދެ ދިވެހިން ކަމަށެވެ. އަދި އެ ދެމީހުން ހައްޔަރުކުރީ ގުލާބީމަގުން ބިދޭސީއަކު ހިފައްޓައި އޭނާގެ އަތުގައި އޮތް ފޯނާއި ވޮލެޓާއި ގިނަ އަދަދެއްގެ ފައިސާ ފޭރެން އުޅެނިކޮށް ކަމަށް އެމީހާ ބުންޏެވެެ.

ބިދޭސީ މީހާ އަތުން ފޭރެން މަސައްކަތް ކުރިއިރު އޭނާގެ އަތުގައި 50000 އަށްވުރެ ގިނަ ރުފިޔާ ހުރި ކަމަށް އެމީހާ އާއި ހަވާލާދީ މަންޒަރު ދުށް މީހާ ބުނެފައިވެއެވެ. މަންޒަރު ދުށް މީހާ އިތުރަށް ބުނީ އެންމެ ފުރަތަމަ ބިދޭސީ މީހާއަށް ބިރުދައްކައިގެން އަތުލީ އޭނާގެ ފޯނު ކަމަށާއި އޭގެ ފަހުން ވޮލެޓް އަތުލުމަށްފަހު އޭނާގެ ޖީބުގައި ހުރި ފައިސާ އަތުލަން މަސައްކަތްކުރުމުން އެކަމަށް ބިދޭސީ މީހާ އިންކާރު ކުރުމުން ވަޅިން ބިރުދެއްކީ ކަމަށެވެ. އަދި ވަޅި ނެގުމުން އެ ބިދޭސީމީހާ ގަދަ ހެދި ކަމަށާއި އަދި ފޭރުނު ދެމީހުންގެ ގައިގައި ބިދޭސީ މީހާ ހިފެހެެއްޓީ ކަމަށް އެމީހާ ބުނެއެވެ. އޭގެ ފަހުން ފުލުހުން އައިސް ދެމީހުން ހައްޔަރުކޮށްގެން ގެންދިޔައީ ކަމަށް އެމީހާ ބުންޏެވެ.

މިހާދިސާ ހިނގި ސަރަހައްދުގެ ސީނުން އެ ދެމީހުން ހައްޔަރުކޮށްފައިވާއިރު ފުލުހުންގެ ފޮރެންސިކް ޓީމެއް ސީނަށް އައިސް ބިދޭސީ މީހާ އަށް ބިރު ދައްކަން ގެންގުޅުނު ވަޅި ވެސް ވަނީ ހޯދާފައެެވެ.

މިމައްސަލާގައި ފުލުހުން ހައްޔަރުކޮށްފައިވަނީ ވައްކަމާއި ފޭރުމުގެ ކުށުގެ ރިކޯޑް އޮތް ބައެއް ކަމަށް އެނގިފައިވެއެވެ.

މިމައްސަލަ އާއި ގުޅިގެން ފުލުހުންގެ ރަސްމީ ބަހެއް އަދި ނުލިބެއެވެ.