އައިޖީއެމްއެޗް ކައިރީ މަގުމަތީހުރި މީހަކަށް ބަޔަކު ހަމަލާދީ ޒަހަމް ކޮށްލައިފިއެވެ.

މައުލޫމާތު ލިބިފައިވާ ގޮތުގައި އެ މީހާއަށް ހަމަލާދީފައިވަނީ ގޭންގު ގުރޫޕަކުންނެވެ. މި މާރާމާރީގައި އަނިޔާވި މީހާއަށް އައިޖީއެމްއެޗްގައި ފަރުވާދޭން މިހާރުވަނީ ފަށާފައެވެ.

ފުލުހުންގެ އިދާރާއިން ދެންމެ ބުނީ، ކަނބާއައިސަރަނި ހިނގުމުގައި، އައިޖީއެމްއެޗު ކައިރީ ހުރި މީހަކަށް ސައިކަލެއްގައި އައި ދެ މީހަކު މަރުތޭލަކުން ހަމަލާދީ ޒަހަމް ކޮށްލާފައިވާކަމުގެ ރިޕޯޓު މިރޭ 8:40 އެހާއިރު ލިބިފައިވާކަމަށެވެ.

އެހެންކަމުން އޭނާއަށް އައިޖީއެމްއެޗްގައި ފަރުވާ ދެމުން ދާކަމަށާއި އެ ތަނުގައި ފުލުހުން ހަރަކާތްތެރިވަމުން ދާކަމަށް ފުލުހުން ވަނީ ބުނެފައެވެ.

ފުލުހުން ބުނީ އަނިޔާވެފައިވަނީ ދިވެހި ފިރިހެނަކަށް ކަމަށާއި މި މައްސަލަ ތަަހުގީގުކުރަން ފަށާފައިވާ ކަމަށެވެ.