މަޝްހޫރު ލަވަކިޔުންތެރިޔާ މުހައްމަދު މާޖިދު (މެޒޯ މުހައްމަދު) އަކީ ޑިމޮކްރެސީއަށް ރާއްޖެ ކުރި ދަތުރުގެ ބޮޑު ހިއްސާދާރެއް ކަމަށް އެމްޑީޕީއިން ބުނެފިއެވެ.

ދިވެހި މުނިފޫހިފިލުވުމުގެ ދާއިރާއަށް ގިނަ ހިދުމަތްތަކެއް ކޮށްދީފައިވާ މެޒޯ މުހައްމަދު މިއަދު ކުއްލި ގޮތަކަށް ނިޔާވެފައިވާއިރު، މިކަމުގެ ހިތާމާގައި ރާއްޖޭގެ އެތައް ބަޔަކު ދަނީ ބައިވެރި ވަމުންނެވެ.



މިއުޒިކް އިންޑަސްޓްރީއަށް ކުރި ހިދުމަތްތަކުގެ އިތުރުން މެޒޯ މުހައްމަދު ވަނީ ސިޔާސީ ދާއިރާގައިވެސް ހިދުމަތްކޮށްފައެވެ.

މި ހިތާމަވެރި ހަބަރު ލިބުމުން ރާއްޖޭގެ ކުރީގެ ރައީސް މުހައްމަދު ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ މެޒޯ މުހައްމަދަކީ އެމަނިކުފާނުގެ އެންމެ ގާތް ރަހްމަތްތެރިންގެ ތެރެއިން އެކަކު ކަމަށާއި، މުހައްމަދަކީ އެމަނިކުފާނުގެ އާންމު މަސައްކަތްތަކުގެ ބޮޑު ބައިވެރިއެއް ކަމަށެވެ.

އަދި މެޒޯ މުހައްމަދަކީ ރާއްޖެ ޑިމޮކްރެސީއަށް ކުރި ދަތުރުގެ ބޮޑު ހިއްސާދާރެއް ކަމަށްވެސް ރައީސް ނަޝީދު ވިދާޅުވިއެވެ.

Mezzo Mohamed akee alhuganduge enme gaaiy rahumaiytherin kuren ekakeve. Alhuganduge aanmu masahkathakuge bodu baiveri ekeve. Raajje Democracy ah kuri dhathuruge hihsaa dhaarekeve.
Mohamed ah suvarugeyge mathiveri niumaiy minvaru kuravvaa, aailaa ah keiytherikan dhevvaashi! pic.twitter.com/30fcs6FZkx

— Mohamed Nasheed (@MohamedNasheed) February 12, 2025

މީގެ އިތުރުން އެމްޑީޕީގެ ޗެއާޕާސަން ފައްޔާޒު އިސްމާއިލް ވެސް ވަނީ މެޒޯ މުހައްމަދު ނިޔާވުމުން އޭނާގެ އާއިލާއަށް ތައުޒިޔާ ވިދާޅުވެފައެވެ.

"ރާއްޖޭގެ މިއުޒިކް އިންޑަސްޓްރީއަށް ގިނަގުނަ ހިދުމަތްތަކެއް ކޮށްދެއްވާފައިވާ ހުނަރުވެރި މިއުޒިޝަން މެޒޯ މުހައްމަދު ނިޔާވުމުގެ ހިތާމައިގައި ބައިވެރިވެ އާއިލާއަށް ކެތްތެރިކަން ދެއްވުމަށް އެދި ދުއާކުރަން. މެޒޯއަކީ ރާއްޖޭގެ އިސްލާހީ ހަރަކާތުގައި އަގުހުރި ހިދުމަތްތަކެއް ކޮށްދެއްވި މުހިންމު ބައިވެރިއެއް" ފައްޔާޒުގެ ޕޯސްޓުގައި ވެއެވެ.

اِنَّا لِلّٰهِ وَاِنَّااِلَيْهِ رَاجِعُوْنَ

ރާއްޖޭގެ މިއުޒިކް އިންޑަސްޓްރީއަށް ގިނަގުނަ ހިދުމަތްތަކެއް ކޮށްދެއްވާފައިވާ ހުނަރުވެރި މިއުޒިޝަން މެޒޯ މުހައްމަދު ނިޔާވުމުގެ ހިތާމައިގައި ބައިވެރިވެ އާއިލާއަށް ކެތްތެރިކަން ދެއްވުމަށް އެދި ދުއާކުރަން. މެޒޯއަކީ ރާއްޖޭގެ އިސްލާހީ…

— Fayyaz Ismail (@faya_i) February 12, 2025

އެމްޑީޕީގެ ރައީސް ޢަބްދުالله ޝާހިދުވެސް ވަނީ އެކްސްގައި ތައުޒިޔާގެ މެސެޖެއްް ހިއްސާ ކުރައްވާފައެވެ.

އެގޮތުން ޝާހިދުވެސް ވަނީ މިއުޒިކް އިންޑަސްޓްރީއަށް މެޒޯ މުހައްމަދު ކުރި ހިދުމަތްތަކުގެ އިތުރުން ޑިމޮކްރެސީ ގާއިމް ކުރުމުގައި މެޒޯ ކުރި މަސައްކަތްތައް ފާހަގަ ކުރައްވާފައެވެ.

ޝާހިދު ވިދާޅުވީ މިއަދު ވަކިވެގެން ގޮސްފައި މިވަނީ މިގައުމަށް ވަރަށް އަގުހުރި ފަރާތެއް ކަމަށެވެ.

Mohamed Majid @mezzomohamed was a talented, skilled, and unique artist that brought entertainment to so many people. He contributed actively to the work of @MDPSecretariat and was a constant advocate for reform and democracy.

Today, we have lost a national treasure. He is loved… pic.twitter.com/0eMzBQhjtv

— Abdulla Shahid (@abdulla_shahid) February 12, 2025

މެޒޯއަކީ ކުޅަދާނަ ލަވަކިޔިންތެރިއަކަށް ވީއިރު، އޭނާ ވަނީ ވަރަށް ގިނަ އަމިއްލަ ރާގުތައްވެސް އުފައްދާފައެވެ. އަދި އޭނާ ވަނީ އޭނާގެ ހުނަރުވެރިކަމުން ގިނަ ބައެއްގެ މަގުބޫލުކަންވެސް ހޯދާފައެވެ.

މެޒޯ މުހައްމަދުގެ އެންމެ މަޝްހޫރު ލަވަތަކުގެ ތެރޭގައި "އުޑުން ތަރިތައް"، "އެޅި މި ކަނޑުމަތި" އަދި "ޖިސްމު ނެތިގެން ގޮސް ހަފުސް" ފަދަ ލަވަތައް ހިމެނެއެވެ. މިއުޒިކްގެ ދާއިރާއަށް މެޒޯ މުހައްމަދު ކުރި ހިދުމަތްތަކުގެ އަގު ވަޒަންކޮށް 2010 ގައި ސަރުކާރުން ވަނީ މިއުޒިކުގެ ދާއިރާއިން ހިތްވަރުދިނުމުގެ ގައުމީ އިނާމު ވެސް އޭނާއަށް ދީފައެވެ.

މެޒޯ މުހައްމަދު ނިޔާވެފައިވަނީ މިއަދު ހާޓް އެޓޭކެއް ޖެހިގެން އައިޖީއެމްއެޗް ގައި ފަރުވާ ދެމުން ދަނިކޮށެވެ.