ކޮންމެ ގުޅުމެއްވެސް ގިނަ ދުވަހަށް ދެމި އޮންނާނީ އެ ގުޅުމެއްގައިވާ ދެ ފަރާތުންވެސް ވަރަށް ބުރަކޮށް މަސައްކަތް ކޮށްގެންނެވެ. ކޮންމެ ދެމެފިރިއެއްގެ ދެމެދުގައިވެސް މައްސަލަތައް ޖެހޭނެއެވެ. ދެބަސްވާންޖެހޭ ފަހަރުތައްވެސް އަންނާނެއެވެ. އަދި އެކަހަލަ ދަނޑިވަޅުތަކުގައި ތިބާ ދެރަވާފަދަ އެއްޗެއް ބައިވެރިޔާ ބުނެވެސްފާނެއެވެ. މިފަހަރު މި ހިމަނާލަނީ ބައިވެރިޔާ ބުނާ އެއްޗެއްގެ ސަބަބުން ދެރަވާނަމަ ކަންތައް ކުރަންވީ ގޮތްތަކެވެ.

ޖަޒުބާތުތައް ހިއްސާ ކުރުން ފަސްކުރުން

ދިމާވާ މައްސަލައެއްގެ ތެރޭގައި ބައިވެރިޔާ ބުނާ އެއްޗެއްގެ ސަބަބުން ހިތުގައި ޖެހޭނަމަ އެވަގުތު ރުޅި އައިސް ތިބާގެ ޖަޒުބާތުތައް ހިއްސާ ކުރުމަކީ އެހާ ރަނހަޅު ކަމެއް ނޫނެވެ. އޭގެ ބަދަލުގައި މަޑުމައިތިރިކަމާއެކު ނޭވާލައި ތިބާގެ ޖަޒުބާތުތައް ކޮންޓްރޯލް ކުރަން މަސައްކަތް ކުރާށެވެ. މިހެން ހެދުމުން ރަނގަޅަށް ވިސްނައި، ހާލަތާ މެދު ރަނގަޅަށް ފިކުރުކޮށް ބުނާނެ އެއްޗަކާމެދު ވިސްްނުމަށް ވަގުތު ލިބޭނެއެވެ.

ބައިވެރިޔާއާ ވާހަކަ ދެއްކުން

ތިބާގެ ޖަޒުބާތުތައް ކޮންޓްރޯލުވެ، މީހާ ހަމަޖެހިލުމަށްފަހު ބައިވެރިޔާއާ ވާހަކަ ދައްކަން މަސައްކަތް ކުރާށެވެ. އަދި ތެދުވެރިކަމާއެކު ހިތުގެ ޝުއޫރުތައް ހިއްސާކޮށް، ބައިވެރިޔާގެ އަމަލުތަކުގެ ސަބަބުން ތިބާއަށް އަސަރު ކުރިގޮތް ބުނެދޭށެވެ. އަދި ބައިވެރިޔާގެ ވާހަކަތައްވެސް އަޑުއަހާށެވެ.

މައްސަލަ ހައްލު ކުރަން މަސައްކަތް ކުރުން



ދެމީހުންވެސް ރަނގަޅަށް ވާހަކަ ދެއްކުމަށްފަހު މައްސަލަ ހައްލު ކުރަން މަސައްކަތް ކުރުމަކީ ވަރަށް މުހިންމު ކަމެކެވެ. އެގޮތުން ބައިވެރިޔާގެ ނަޒަރިއްޔާތުން ކަންކަން ދެކެން މަސައްކަތް ކޮށް ހައްލެއް ހޯދާށެވެ. އަދި މުސްތަގުބަލުގައި އެފަދަ ހާލަތްތައް ތަކުރާރުވިޔަ ނުދިނުމަށްޓަކައި ވަކި އުސޫލުތަކެއް ކަނޑައަޅާށެވެ.

މަސްދަރު: އީޓައިމްސް