ބޮލީވުޑްގެ ސުޕަސްޓާރ ތަރި ސަލްމާން ޚާންގެ ފިލްމު "ސިކަންދަރު" ވަރަށް ގިނަ ސިނަމާތަކުގައި އެޅުވުން ހުއްޓާލާފައިވާ ކަމަށް މީޑިއާތަކުން ރިޕޯޓު ކޮށްފިއެވެ.

މި ފިލްމު ނެރުނީ މިއަހަރު މާރޗު 30 ވަނަ ދުވަހުއެވެ. މި ފިލްމަށް އިންޑިއާގެ ބައެއް ހިސާބުތަކުގައި ބޮޑު ތަރުހީބެއް ލިބުނު ނަމަވެސް، ބައެއް ހިސާބުތަކުގައި މި ފިލްމަށް ތަރުހީބު ލިބިފައި ނުވާކަމަށް މީޑިއާތަކުން ވަނީ ރިޕޯޓު ކޮށްފައެވެ.

ބޮލީވުޑް ހަންގާމާގެ ރިޕޯޓެއްގައި ބުނެފައިވަނީ އިންޑިއާގެ ބައެއް ހިސާބުތަކުގެ ސިނަމާތަކަށް މި ފިލްމު ބެލުމަށް އެއްވެސް ވަރަކަށް މީހުން ގޮސްފައި ނުވުމުގެ ސަބަބުން، ފިލްމު އެ ސިނަމާތަކުގައި އެޅުވުން ހުއްޓާލާފައިވާ ކަމަށެވެ. އޭގެ ތެރޭގައި ސޫރަތު، އަހްމަދުއާބާދު، ބޯޕާލު އަދި އިންދޯރުގެ ސިނަމާތައް ހިމެނެއެވެ.

ރިޕޯޓުތަކުގައި ބުނެފައިވަނީ އީދު ފާހަގަ ނުކުރާ ހިސާބުތަކުގައި މި ފިލްމަށް އެއްވެސް ވަރެއްގެ ތަރުހީބެއް ލިބިފައި ނުވާ ކަމަށެވެ. އެހެންވެ، ސިކަންދަރު ސިނަމާތަކުން ނެގުމަށްފަހު، ބެލުންތެރިންގެ ތަރުހީބު އޮތް ފިލްމުތައް ވަނީ މި ސިނަމާތަކުގައި އަޅުވަން ފަށާފައެވެ.

ގިނަ ހިސާބުތަކުން މި ފިލްމު ކެންސަލް ކުރި ނަމަވެސް، މުމްބާއީގެ އެންމެ މަޝްހޫރު ސިނަމާ ޖީ7 މަލްޓިޕްލެކްސްގައި މި ފިލްމު އެޅުވުމުން ފިލްމަށް ވަނީ ބޮޑު ތަރުހީބެއް ލިބިފައެވެ. އަދި މި ސިނަމާގައި ފިލްމު އެޅުވިއިރު "ހައުސް ފުލް" ކަމަށްވެސް ރިޕޯޓުތައް ބުނެއެވެ.

ރިޕޯޓުތަކުގައި ބުނެފައިވަނީ މުމްބާއީގެ އެންމެ މަޝްހޫރު ސިނަމާގައި މި ފިލްމަށް ތަރުހީބު އޮތުމުން އެކަމުންވެސް ސަލްމާނަކީ ވަރަށް ހުނަރުވެރި ތަރިއެއްކަން ދޭހަވާކަމަށެވެ.