ސަލްޓަން ޕާކު އަލުން ތަރައްގީކުރާނީ އެއް ގަހުން އަނެއް ގަހަށް ދެވޭ ގޮތަށް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް އޮފީހުން ގެނެސްދޭ "ރައްޔިތުންނާ އެކު" ޕޮޑްކާސްޓުގެ ދެވަނަ އެޕިސޯޑުގައި ރައީސް މުއިއްޒު މިއަދު ވިދާޅުވީ ގޭތެރޭގައި ބަންދުވެފައި ތިބުމުގެ ބަދަލުގައި ކުދިންނެރެ، އާއިލާއާ އެކީގައި ގޮސް ތަންކޮޅެއް ހިތްހަމަޖެހޭ ތަނެއްގައި ވަގުތުކޮޅެއް ހޭދަކޮށްލުން މުހިންމު ކަމަށެވެ.

އަދި އޭގެ ސަބަބުން ސިކުނޑިއަށް ވެސް ހިތްހަމަ ޖެހޭކަން ފާހަގަކުރައްވައި ރައީސް ވިދާޅުވީ މިހާރު މަސައްކަތް ކުރަމުންދަނީ އަލުން ރީތިކޮށް ސަލްޓަން ޕާކު ހަދާލަން ކަމަށެވެ.

އަދި އަލުން ސަލްޓަން ޕާކު ތަރައްގީކުރާނީ ކުރިއަށްވުރެ ގިނަ ކަންކަން ހިމެނޭ ގޮތަށް ކަމަށް ވެސް ރައީސް ވިދާޅުވި އެވެ.

"ސަލްޓަން ޕާކަކީ ވަރަށްގިނަ ގަސް ހުންނަ ތަނެއްވީމާ، އަޅުގަނޑުމެން ހަދާއިރުގައި، އެއްގަހުން އަނެއް ގަހަށް ދެވޭގޮތަށް، މަތީގައި އެކިކަހަލަ އެކްޓިވިޓީޒްތައް ހިމަނާފައި، އެކަހަލަ ބައިބައި ހިމަނާފައި، ކުރަން ނިންމާފައި މިއޮތީ އިނގޭތޯ. ތަންކޮޅެއް ޝައުގުވެރިވާ ކަހަލަ ގޮތަކަށް އިނގޭތޯ. ކުޑަކުދިންނަށް އެކަންޏެއް ނޫން. ކުޑަކުދިންނާއި، ޒުވާނުންނާއި، ބޮޑެތި މީހުންނާ، ހުރިހާ އެންމެންނަށްވެސް ބޭނުންކުރެވޭ ކަހަލަ ކަންތައްތައް ހިމެނޭނެ. އެއްގަހުން އަނެއް ގަހަށް ގޮސްލައި ހަދައިލެވޭކަހަލަ، ތަންކޮޅެއް އެޑްވެންޗަރަސްއޭ މި ކިޔާކަހަލަ ކަންތައްތައް. ބިންމަތީ ލެވެލްގެ އިތުރަށް، މަތީގައި ކުޑަ ޕާކެއް އަންނާނެ ކަމަށް ބައްލަވަންވީ އިނގޭތޯ. ދެން އޭގެއިތުރަށްވެސް ކަންތައްތައް ހިމެނޭގޮތަށް، ޕާކުތައް މި ހެދެނީ. މިއީ ވަރަށް މުހިންމު ކަމެއް." ރައީސް ވިދާޅުވި އެވެ.