ލ. މާވަށު "ހޮޅުދޫ ބޯޓު" ގައި ހިނގި އަލިފާނުގެ ހާދިސާގައި އެބޯޓުން ދަތުރު ކުރި މީހުންގެ ތެރެއިން ޒުވާނަކު ގެއްލިގެން ހޯދަން ފަށައިފިއެވެ.

އެމްއެންޑީއެފުން ބުނީ "ހޮޅުދޫ ބޯޓް" ނަމަކަށް ކިޔާ މުދާ އުފުލާ ބޯޓެއްގައި އަލިފާން ރޯވެގެން، އެމްއެންޑީއެފް ސެންޓްރަލް އޭރިއާ ކޮމާންޑް، ކައްދޫ ފަޔާ ސްޓޭޝަނުގެ ފަޔާ ފައިޓަރުން މިހާރު ހަރަކާތްތެރިވަމުން އަންނަ ކަމަށެވެ.

އެމްއެންޑީއެފުން މަޢުލޫމާތު ދީފައިވާ ގޮތުގައި، މި ހާދިސާ ހިނގާފައިވަނީ ބޯޓު ތ. ކަނޑޫދޫ ކައިރިން ދަނިކޮށެވެ. ހިރިލަންދޫއިން ފުރައިގެން މާލެއަށް ދަތުރުކުރަމުންދިޔަ މާވަށު "ހޮޅުދޫ ބޯޓު"ގައި އަލިފާނުގެ ހާދިސާ ހިނގިއިރު ބޯޓުގައި ތިބީ 17 މީހުންނެވެ. އޭގެ ތެރޭގައި 11 ދިވެހިންނާއި 7 ބިދޭސީން ހިމެނެއެވެ.

އަލިފާން ރޯވުމާ ގުޅިގެން ބޯޓުގައި ތިބި އެންމެން ވަނީ މޫދަށް ފުންމާލާފައެވެ. ނަމަވެސް، މޫދަށް ފުންމާލި މީހުންގެ ތެރެއިން އެކަކު ގެއްލިގެން އޭނާ ހޯދުމުގެ މަސައްކަތް މިހާރު ދަނީ ކުރަމުންނެވެ.

އެމްއެންޑީއެފުން ހާމަކުރި ގޮތުގައި، ގެއްލިފައިވަނީ ލ. މާވަށަށް ނިސްބަތްވާ 25 އަހަރުގެ އަލީ މުޝްފިގް މުހައްމަދެވެ. މިވަގުތު އޭނާ ހޯދުމުގެ މަސައްކަތް ދަނީ ކުރަމުންނެވެ.

މީގެ އިތުރުން، މި ހާދިސާގައި ދެ މީހަކަށް އަނިޔާވެފައިވާ ކަމަށާއި، އެ ދެ މީހުންނަށް މިހާރު ކަނޑޫދޫ ސިއްހީ މަރުކަޒުގައި ފަރުވާ ދޭން ފަށާފައިވާ ކަމަށް އެމްއެންޑީއެފުން މައުލޫމާތުދެއެވެ.

އަލިފާނުގެ ސަބަބުން ހޮޅުދޫ ބޯޓު ވަނީ ބޭނުން ނުކުރެވޭ ވަރަށް އަނދައި ހުލިވެފައެވެ. ނަމަވެސް، ބޯޓުގައި އަލިފާން ރޯވާން ދިމާވި ސަބަބެއް އަދި ސާފުވާގޮތެއް ނުވެއެވެ.