މާލެ ދަތުރު ކުރަމުން ދަނިކޮށް އަލިފާން ރޯވެގެން އަޑިއަށް ދިޔަ ހޮޅުދޫ ބޯޓުން ކަނޑަށް ފުންމާލި މީހުންގެ ތެރެއިން ގެއްލުނު ޒުވާނާ ހޯދުމަށް 53.04 އަކަ ނޯޓިކަލް މޭލް ބަލާފައިވާ ކަމަށް އެމްއެންޑީއެފުން ބުނެފިއެވެ.

މިހާދިސާގައި ގެއްލިގެން ހޯދަމުންދަނީ ލ. މާވަށަށް އުފަން އުމުރުން 25 އަހަރުގެ އަލީ މުޝްފިގް މުހައްމަދު ޝަރީފެވެ. އެމްއެންޑީއެފުން މިރޭ ބުނީ މުޝްފިގް ހޯދުމަށް ކުރިއަށް ގެންދާ އޮޕަރޭޝަނުގެ ސަރފޭސް ސަރޗްގައި 53.04 އަކަ ނޯޓިކަލް މޭލް ބަލާފައިވާ ކަމަށެވެ. އަދި ޑައިވް ކޮށްގެން 64،240 އަކަމީޓަރު ބަލާފައިވާއިރު، ވައިގެ މަގުން 1،545 އަކަ މޭލް (4000 އަކަމީޓަރު) ބަލާފައިވާ ކަމަށް އެމްއެންޑީއެފުން ބުނެއެވެ. މުޝްފިގު ހޯދުމުގެ މަސައްކަތުގައި ކަނޑާއި ވައިގެމަގުން އަދި ޑައިވަރުން ވެސް ހަރަކާތްތެރިވަމުންދާ ކަމަށް އެމްއެންޑީއެފުން ބުންޏެވެެ.

އެމްއެންޑީއެފުން މަޢުލޫމާތު ދީފައިވާ ގޮތުގައި، މި ހާދިސާ ހިނގާފައިވަނީ އިންޖީނަށް މައްސަލައެއް ދިމާވެ ބޯޓު ތ. ކަނޑޫދޫ ކައިރިން ދަނިކޮށެވެ. ހިރިލަންދޫއިން ފުރައިގެން މާލެއަށް ދަތުރުކުރަމުންދިޔަ މާވަށު "ހޮޅުދޫ ބޯޓު"ގައި އަލިފާނުގެ ހާދިސާ ހިނގިއިރު ބޯޓުގައި ތިބީ 18 މީހުންނެވެ. އޭގެ ތެރޭގައި 12 ދިވެހިންނާއި 7 ބިދޭސީން ހިމެނެއެވެ. އޭގެ ތެެރެއިން އަލީ މުޝްފިގް މުހައްމަދު ޝަރީފް ފިޔަވައި އެންމެން ވަނީ ސަލާމަތްވެފައެވެ.