މޯލްޑިވްސް ސްޓޫޑެންޓްސް އެސޯސިއޭޝަން-ޔޫކޭ (އެމްއެސްއޭ) އިން ބީއެމްއެލްގައި ހުޅުވާފައިވާ އެކައުންޓަށް ކޮންމެ އަހަރަކު 2،000 ޕައުންޑަށް ވާ ވަރަށް ޑޮލަރު ޖަމާކޮށްދެއްވާނެ ކަމަށް ރައީސް ޑރ. މުޙައްމަދު މުޢިއްޒު އިއުލާންކުރަށްވައިފިއެވެ.

އިނގިރޭސިވިލާތުގައި ކިޔަވަން ތިބި ދިވެހި ދަރިވަރުންނާ ބައްދަލުކުރައްވައި ރައީސް ޑރ. މުޙައްމަދު މުޢިއްޒު ވިދާޅުވީ ބީއެމްއެލްގައި ހުޅުވާފައިވާ އެމްއެސްއޭގެ އެކައުންޓަށް ދެން ކޮންމެ އަހަރަކު ވެސް 2،000 ޕައުންޑަށް ވާ ވަރަށް ޑޮލަރު ޖަމާކޮށްދޭނެ ކަމަށެވެ. އެގޮތުން މި ހަފުތާގެ ތެރޭގައި މި އަހަރަށް ހަމަޖައްސާފައިވާ ފައިސާ ޖަމާކޮށްދީފައިވާނެ ކަމަށް ރައީސް މުޢިއްޒު ވިދާޅުވިއެވެ. ރައީސް ވިދާޅުވީ އެ ޖަމިއްޔާއިން ހިންގާ ކަންކަމަށް އޭގެ ބޭނުން ހިފޭނެކަމަށެވެ.

"ކޮންމެ އަހަރަކުވެސް އިރާދަކުރެއްވިއްޔާ ޖަނަވަރީ މަހުގެ ކުރީކޮޅު މިދެންނެވި އަދަދަށް އެމްއެސްއޭގެ އެކައުންޓަށް ފައިސާ ޖަމާކޮށްދޭނަން، މީގެކުރީގައި އަޅުގަނޑުމެން އެމްއެސްއޭގައި އުޅުނުއިރުގައި އޭރުގައި އޮތް ސަރުކާރުތަކުން ކޮންމެސް އެއްޗެއް ދެއްވާނެ ސަރުކާރުން، އޭރުގައި ދެއްވަނީ 1000 ޑޮލަރު ދެން ފަންޑު ރައިޒް ކޮށްގެން އެކަންކަން ކުރަމުން އައީ،" ރައީސް މުޢިއްޒު ވިދާޅުވިއެވެ.

މި ބައްދަލުކުރެއްވުމުގައި ރައީސް މުޢިއްޒު ވަނީ އިނގިރޭސިވިލާތުގައި ދިރިއުޅޭ ދަރިވަރުން ބޭނުންކުރަމުން ދިޔަ އިމާރާތް، ނަންބަރު 9 ރޯޒްމޮންޓް އެވެނިއު އަލުން މޯލްޑިވްސް ސްޓޫޑެންޓްސް އެސޯސިއޭޝަން-ޔޫކޭ (އެމްއެސްއޭ) އާ ހަވާލުކުރިކަން ވެސް ހާމަކުރަށްވާފަ އެވެ.