މިވަގުތު ރާއްޖެއަށް އެންމެ ރަނގަޅު ގޮތަކީ އެމްޑީޕީއާއި ޑިމޮކްރެޓްސް ގުޅުން ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެއެވެ.

ކުރީގެ ރައީސް މުޙައްމަދު ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ، އެމަނިކުފާނަށް ފެނިވަޑައިގަންނަވާ ގޮތުގައި މިވަގުތު ރާއްޖެއަށް އެންމެ ރަނގަޅު ގޮތަކީ އެމްޑީޕީއާއި ޑިމޮކްރެޓްސް ގުޅުން ކަމަށެވެ.

ނަޝީދު މިހެން ވިދާޅުވެފައިވާއިރު ޑިމޮކްރެޓްސް އުފެއްދުުމުގައި އިސްކޮށް އުޅުއްވި ހަސަން ލަތީފް، މުޙައްމަދު ޝިފާޒު، ހުސައިން އަމްރު އަދި ޢަލީ ޢާޒިމްވެސް މިހާރު ވަނީ އެމްޑީޕީއާއި ގުޅިވަޑައިގެންފައެވެ.

ޑިމޮކްރެޓްސްއަކީ އެމްޑީޕީގެ ކުރީގެ ރައީސް މުޙައްމަދު ނަޝީދު އަށް ތާއިދުކުރާ އެމްޑީޕީގެ މެންބަރުން އިސްކޮށް ތިބެ އުފެއްދި ޕާޓީއެކެވެ. އެ ޕާޓީ އުފެދިފައިވަނީ ކުރީގެ ރައީސް ސާލިޙްގެ ވެރިކަމުގައި އެމްޑީޕީގެ އެތެރޭގައި އުފެދުނު ޚިޔާލު ތަފާތުވުންތަކާ ގުޅިގެންނެވެ.

ރާއްޖެޓީވީގެ ޕްރޮގުރާމެއްގައި ވާހަކަފުޅު ދައްކަވަމުން ކުރީގެ ރައީސް އިބްރާހިމް މުޙައްމަދު ސޯލިހް ވިދާޅުވެފައިވަނީ އެމްޑީޕީ އަށް 2028 ވަނަ އަހަރު ވެރިކަމަށް އާދެވޭނީ ޕާޓީ އެކަތިގަނޑެއްގެ ގޮތުގައި އޮވެގެން ކަމަށެވެ. އަދި އެމްޑީޕީން ވަކިވެގެން ދިޔަ ބޭފުޅުން އަލުން ވިސްނައި އެކުގައި ގުޅިގެން މަސައްކަތް ކުރަން ޖެހޭ ކަމަށް ޞާލިޙް ވިދާޅުވިއެވެ. ރައީސް ސޯލިހް ވިދާޅުވީ އެމްޑީޕީ އަކީ ވަކިވެގެންދިޔަ ބޭފުޅުން ހިމެނޭހެން އެންމެން ގުޅިގެން އުފެއްދި ޕާޓީ އެއް ކަމަށެވެ.

ސޯލިޙް ވިދާޅުވީ ޒާތީ މައްސަލަތަކާއި އެމަނިކުފާނާއި ދޭތެރޭގައި ޖެހިފައިވާ މައްސަލައެއް ވިޔަސް ދޫކޮށްލުމަށްފަހު ގައުމަށްޓަކައި އެންމެން ގުޅިގެން މަސައްކަތް ކުރަންޖެހޭ ކަމަށެވެ. އެމްޑީޕީން ފެށި މަސައްކަތް ނިމުމަށް ރައްޔިތުން ނޭދޭނެ ކަމަށާއި އެކީގައި އަދިވެސް އެބޭފުޅުންނާއެކު މަސައްކަތް ކުރެވޭނެ ކަމަަށް ރައީސް ސޯލިހް ވިދާޅުވިއެވެ.



ކިޔުންތެރިންގެ ހިޔާލު



ޓްރެންޑިން