2028 ވަނަ އަހަރު އޮންނަ ރިޔާސީ އިންތިހާބުގައި އެމްޑީޕީގެ ޓިކެޓްގައި ވާދަކުރުމަށް އެ ޕާޓީގެ ޕްރައިމަރީގައި ވާދަކުރަން ޝައުގުވެރިކަން ހުރިކަން ހުޅުމާލެ ދެކުނު ދާއިރާގެ މެމްބަރު ޑރ. އަޙްމަދު ޝަމްހީދު ހާމަކުރައްވައިފިއެވެ.

މިކަން ހާމަވެފައިވަނީ އޭނާ މިއަދު އެމްޑީޕީގެ ބައެއް މެންބަރުންނަށް ފޮނުއްވި މެސެޖަކުންނެވެ.

އެ މެސެޖުގައި ޝަމްހީދު ވިދާޅުވެފައިވަނީ 2028 ވަނަ އަހަރުގެ ރިޔާސީ އިންތިހާބުގައި ޕާޓީގެ ޓިކެޓު ލިބިވަޑައިގަންނަވާ ކެންޑިޑޭޓަކު ހޮވުމަށް ބާއްވާ ޕްރައިމަރީގައި ވާދަކުރުމުގެ ފުރުސަތުތައް ހޯދުމަށް ބައްދަލުވުންތަކެއް ބާއްވަވަން ވިސްނަވަމުން ގެންދަވާ ކަމަށެވެ.

އަދި ރިޔާސީ އިންތިހާބަށް އަޅާ ފުރަތަމަ ފިޔަވަޅެެްގެ ގޮތުން މިކަމުގައި މެންބަރުންގެ ތާއީދަށް އޭނާ ވަނީ އެދިވަޑައިގެންފައެވެ.

އެމްޑީޕީގެ ރިޔާސީ ޕްރައިމަރީއަށް ޝަމްހީދު ޝައުގުވެރިކަން ފާޅުކުރައްވާފައިވާއިރު އެމްޑީޕީގެ ލީޑަރޝިޕްގެ ބައެއް އެހެން ބޭފުޅުންވެސް މިހާރުވަނީ ޓިކެޓަށް ޝައުގުވެރިކަން ފާޅުކުރައްވާފައެވެ.

އޭގެ ތެރޭގައި، ޗެއަރޕާސަން ފައްޔާޒު އިސްމާޢީލް، އަަދި ކުރީގެ ރައީސް އިބްރާހީމް މުޙައްމަދު ޟާލިޙް ހިމެނިވަޑައިގަންނަވައެވެ. އަދި ސީދާގޮތެއްގައި އިއުލާނު ނުކުރެއްވިނަމަވެސް، އެ ޕާޓީގެ ރައީސް ޢަބްދުالله ޝާހިދާއި، މާލެ ސިޓީގެ މޭޔަރު އާދަމް އާޒިމް އަދި ކުރީގެ ނައިބު ރައީސް ފައިޟަލް ނަސީމް ވެސް ޕްރައިމަރީގައި ވާދަކުރެއްވުމަށް މަސައްކަތް ކުރައްވަމުންް ގެންދަވާކަން ވަނީ ފެންމަތިވެފައެވެ.



ކިޔުންތެރިންގެ ހިޔާލު



ޓްރެންޑިން