މޫނުގައި ބިހި ނެގުމަކީ ވަރަށް ގިނަ ޒުވާނުންނަށާއި ބޮޑެތި މީހުންނަށް ދިމާވާ މައްސަލައެކެވެ. މޫނުގައި އުނގުޅާ ކްރީމްތަކާއި ބޭނުންކުރާ ސައިބޯނި ފަދަ ތަކެތީގެ އިތުރުން، އަޅުގަނޑުމެންގެ ކާބޯތަކެތީގެ ސަބަބުން ވެސް ހަންގަނޑަށް ބޮޑެތި ބަދަލުތަކެއް އާދެއެވެ. ސިއްހީ މާހިރުން ދެކޭގޮތުގައި، ހަށިގަނޑުގެ އެތެރެއަށް ފޮނުވާލެވޭ ބައެއް ކާބޯތަކެތީގެ ސަބަބުން ހަންގަނޑުގައި އިންފްލެމޭޝަން އުފެދި، ބިހި ނެގުމަށް މަގުފަހިވެއެވެ. އެހެންކަމުން މޫނުގައި ބިހި ނެގުން މަދުކުރުމަށްޓަކައި ބައެއް ކާބޯތަކެތިން ދުރުހެލިވުން މުހިންމެވެ.

މޫނުގައި ބިހި ނެގުމަށް އެންމެ ބޮޑަށް މަގުފަހިވާ އެކައްޗަކީ ހަކުރު ގިނަ ކާބޯތަކެތި ނުވަތަ "ރިފައިންޑް ކާބޯހައިޑްރޭޓްސް" އެވެ. މީގެ ތެރޭގައި ހުދު ފާރޮށި، ހުދު ހަނޑޫ، ޕާސްތާ، އަދި ހަކުރު ގިނައިން ހުންނަ ފޮނި ބުއިންތަކާއި މެޓާ ފަދަ ތަކެތި ހިމެނެއެވެ. މިފަދަ ތަކެތި ކެއުމުން ލޭގައި ހަކުރު ހުންނަ މިންވަރު ކުއްލިއަކަށް މަތިވެ، އިންސިއުލިންގެ މިންވަރު އިތުރުވެގެން ދެއެވެ. އިންސިއުލިން މަތިވުމަކީ މޫނުގައި ހުންނަ ތެޔޮ އުފައްދާ ގްލޭންޑްތައް މާ ބޮޑަށް ހީވާގިވެ، މޫނުގައި ބިހި ނެގުމަށް މެދުވެރިވާ ސަބަބެކެވެ.

ދެވަނަ ކަމަކަށް ފާހަގަކޮށްލެވެނީ ކިރާއި ކިރުގެ ބާވަތްތަކެވެ. ބައެއް ދިރާސާތަކުން ދައްކާގޮތުގައި ގެރިކިރާއި، ޗީޒް އަދި އައިސްކްރީމް ފަދަ ތަކެތި ބޭނުންކުރުމަކީ ބައެއް މީހުންގެ މޫނުގައި ބިހި ނެގުން އިތުރުވާ ކަމެކެވެ. މީގެ ސަބަބަކީ ކިރުގެ ބާވަތްތަކުގައި ހުންނަ ހޯރމޯންތަކުގެ ސަބަބުން ހަށިގަނޑުގެ އިންސިއުލިން ފެންވަރަށް ބަދަލު އައުމެވެ. އެހެންކަމުން، މޫނުގައި ބިހި ނެގުމުގެ މައްސަލަ ބޮޑުނަމަ، ކިރުގެ ބާވަތްތައް މަދުކޮށްލުމަކީ ހަންގަނޑަށް ލިބޭނެ ވަރަށް ބޮޑު ލުޔެކެވެ.

ފާސްޓް ފުޑް ނުވަތަ ތެޔޮ ގިނަ ކާތަކެއްޗަކީ ވެސް ހަންގަނޑުގެ ސިއްހަތަށް ހުރި ނުރައްކަލެކެވެ. ބާރގާ، ފްރެންޗް ފްރައިޒް، އަދި ތެލުލާފައި ހުންނަ ކާތަކެތީގައި ކެލަރީއާއި، ސަރުބީ އަދި ރިފައިންޑް ކާބްސް ގިނަ އަދަދަކަށް އެކުލެވިގެންވެއެވެ. މިފަދަ ތަކެތީގެ ސަބަބުން ހަށިގަނޑުގައި އިންފްލެމޭޝަން އުފެދި އޭގެ އަސަރު ހަންގަނޑަށް ކުރެއެވެ. މީގެ އިތުރުން މާ ގިނައިން ޗޮކްލެޓް ކެއުމަކީ ވެސް ބައެއް މީހުންނަށް ބިހި ނެގުމަށް މެދުވެރިވާ ސަބަބެއް ކަމަށް ބައެއް ދިރާސާތަކުން ބުނެއެވެ.

މޫނުގައި ނަގާ ބިހިތަކުން ސަލާމަތްވުމަށްޓަކައި ހަމައެކަނި ބޭރުން ބޭނުންކުރާ އެއްޗެއްސަށް ބަރޯސާވުމުގެ ބަދަލުގައި، ކާބޯތަކެތީގެ އާދަތަކަށް ބަދަލު ގެނައުން މުހިންމެވެ. ގިނައިން ފެން ބުއިމާއި، ތަރުކާރީއާއި މޭވާ ކެއުމަކީ ހަންގަނޑު ސާފުކޮށް ބެހެއްޓުމަށް އެހީތެރިވެދޭނެ ކަންކަމެވެ.