އިރާނުގެ އެންމެ ފަހުގެ ރަސްގެފާނު (ޝާހު) ގެ ދަރިކަލުން ރިޒާ ޕަހްލަވީ، އިރާނުގެ މިހާރުގެ ސަރުކާރު ވައްޓާލުމަށް ކުރަމުންދާ މަސައްކަތުގައި ބައިނަލްއަގުވާމީ މުޖުތަމައުގެ އެހީތެރިކަމަށް ގޮވާލައްވައިފިއެވެ. އެމެރިކާގައި ދިރިއުޅުއްވާ އިދިކޮޅު ލީޑަރު ޕަހްލަވީ ވިދާޅުވީ، އިރާނުގެ އިސްލާމީ ޖުމްހޫރިއްޔާ ފަހިވެގެންދާނީ "ވާނެތޯ ނުވަތަ ނޫންތޯ" އާ މެދު އުފެދޭ ސުވާލަކަށް ނޫން ކަމަށާއި، އެއީ ހަމައެކަނި "ވާނީ ކޮން އިރަކުތޯ" އޮތް ސުވާލެއް ކަމަށެވެ. ވޮޝިންޓަންގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އޭނާ ވަނީ އިރާނުގެ ރިވޮލިއުޝަނަރީ ގާޑްގެ ލީޑަޝިޕަށް އަމާޒުކޮށް "ސާޖިކަލް ސްޓްރައިކް" ނުވަތަ ވަރުގަދަ ހަމަލާތަކެއް ދިނުމަށް ދުނިޔޭގެ ބާރުތަކަށް ބާރުއަޅުއްވާފައެވެ. އޭނާ ގަބޫލުކުރައްވާ ގޮތުގައި މިފަދަ ފިޔަވަޅުތަކެއްގެ ސަބަބުން އިތުރު އިންސާނީ ފުރާނަ ގެއްލުން ހުއްޓުވައި، ސަރުކާރު ބަދަލުކުރުމުގެ މަސައްކަތް އަވަސްވެގެންދާނެއެވެ.

އިރާނުގެ އިގްތިސާދީ ހާލަތާ ގުޅިގެން ޑިސެމްބަރު 28 ގައި ފެށުނު މި މުޒާހަރާތައް މިހާރު ވަނީ އެ ގައުމުގެ އެންމެ މަތީ ލީޑަރު އާޔަތުﷲ އަލީ ޚާމަނާއީގެ ވެރިކަން ނިމުމަކަށް ގެނައުމަށް ގޮވާލާ ބޮޑު ހަރަކާތަކަށް ބަދަލުވެފައެވެ. އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ރިޕޯޓްކުރާ ގޮތުގައި މިހާތަނަށް 3000 އަށްވުރެ ގިނަ މުޒާހަރާގެ ބައިވެރިން ވަނީ މަރާލާފައެވެ. ނަމަވެސް އިރާނުގެ ސަރުކާރުން މި ހަރަކާތްތައް ސިފަކުރަނީ ބޭރުގެ ދުޝްމަނުންގެ އެހީތެރިކަމާއެކު ހިންގާ "ހަމަނުޖެހުންތަކެއް" ގެ ގޮތުގައެވެ. މުޒާހަރާތައް ހުއްޓުވުމަށްޓަކައި ސަރުކާރުން ބާރުގެ ބޭނުންކުރަމުންދާއިރު، މުޅި ގައުމުން އިންޓަނެޓްގެ ޚިދުމަތް ކަނޑާލައި މުވާސަލާތީ ގުޅުންތައް ވަނީ ބަންދުކޮށްފައެވެ.

ޕަހްލަވީ އިތުރަށް ވިދާޅުވީ، އިރާނުގެ ސަލާމަތީ ބާރުތަކުގެ ބައެއް ފަރާތްތަކުން އާންމުންނާ ދެކޮޅަށް ހަރަކާތްތެރިވާން ދެކޮޅު ހަދަމުންދާ ކަމަށާއި، އެހެންކަމުން ސަރުކާރުން ބޭރުގެ ހަނގުރާމަވެރިން ގެނެސްގެން މުޒާހަރާތައް މަނާކުރަން މަސައްކަތް ކުރަމުންދާ ކަމަށެވެ. އޭނާ ވަނީ ދުނިޔޭގެ ގައުމުތަކުން އިރާނަށް އިގްތިސާދީ ފިއްތުންތައް ކުރިމަތިކުރުމަށާއި، އިރާނުގެ ޑިޕްލޮމޭޓުން ގައުމުތަކުން ބޭރުކުރުމަށާއި، އަދި ސްޓާލިންކް ފަދަ ސެޓެލައިޓް އިންޓަނެޓްގެ އެހީގައި އިރާނުގެ ރައްޔިތުންނަށް މުވާސަލާތީ ފުރުސަތުތައް ފަހިކޮށްދިނުމަށް އެދިވަޑައިގެންފައެވެ. "ދުނިޔޭގެ އެހީތެރިކަމާ އެކު ނުވަތަ ނުލައި ވެސް މި ސަރުކާރު ވެއްޓޭނެ. އެކަމަކު ދުނިޔެއިން އަމަލީ ގޮތުން މަސައްކަތް ފަށައިފިނަމަ ގިނަ ފުރާނަތަކެއް ސަލާމަތްކުރެވޭނެ،" ޕަހްލަވީ ވިދާޅުވިއެވެ.

މީގެ އިތުރުން، އެމެރިކާގެ ރައީސް ޑޮނަލްޑް ޓްރަމްޕަކީ ވައުދު ފުއްދަވާ ބޭފުޅެއް ކަމަށާއި، އެންމެ ފަހު ވަގުތު އޭނާ ހުންނަވާނީ އިރާނުގެ ރައްޔިތުންނާ އެކު ކަމަށް ގަބޫލުކުރައްވާ ކަމަށް ވެސް ޕަހްލަވީ ވިދާޅުވިއެވެ. ރައީސް ޓްރަމްޕް ވަނީ މުޒާހަރާގެ ބައިވެރިން މަރާނަމަ އިރާނާ ދެކޮޅަށް ވަރުގަދަ ފިޔަވަޅު އަޅާނެ ކަމުގެ އިންޒާރު މީގެ ކުރިން ދެއްވާފައެވެ. މި ނުތަނަވަސްކަމާ ގުޅިގެން މެދުއިރުމަތީގައި އޮންނަ އެމެރިކާގެ އަސްކަރީ މަރުކަޒުތަކުން ބައެއް މުވައްޒަފުން މަދުކޮށްފައިވާއިރު، އިރާނުން ބުނެފައިވަނީ އެމެރިކާއިން ހަމަލާއެއް ދީފިނަމަ އިސްރާއީލަށާއި އެމެރިކާގެ މަސްލަހަތު އޮންނަ ތަންތަނަށް ހަމަލާދޭނެ ކަމަށެވެ. ޕަހްލަވީ ވަނީ ކުރިމަގުގައި އިރާނަށް އެނބުރި ވަޑައިގެން އާ ގާނޫނުއަސާސީއެއް އެކުލަވާލުމުގެ މަސައްކަތުގައި ބައިވެރިވެވަޑައިގަންނަވާނެ ކަމަށް ވައުދުވެވަޑައިގެންފައެވެ.