ކައުންސިލް އިންތިޚާބުގައި ވާދަކުރާ ކެންޑިޑޭޓުން ފޯމު ހުށަހެޅުމުގައި އިލެކްޝަންސް ކޮމިޝަން (އީސީ) ޤާނޫނާ ޚިލާފު ޝަރުތުތަކެއް ކުރިމަތިކުރުވަމުންދާ ކަމަށް ބުނެ، އެކަން އިސްލާހު ނުކޮށްފި ނަމަ ކޯޓަށް މައްސަލަ ހުށަހަޅާނެ ކަމުގެ އިންޒާރު ޕީޕަލްސް ނޭޝަނަލް ކޮންގްރެސް (ޕީއެންއެފް) އިން ދީފިއެވެ.

މިކަމާ ގުޅޭގޮތުން އެ ޕާޓީގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވީ، ހަމައެކަނި އޮންލައިންކޮށް ފޯމު ހުށަހަޅަން މަޖުބޫރު ކުރުމަކީ ބަލައިގަނެވޭނެ ކަމެއް ނޫން ކަމަށާއި، އީސީއަށް ގޮސްގެން މެނުއަލްކޮށް ފޯމު ހުށަހެޅޭނެ އިންތިޒާމު ވެސް ހަމަޖެހިފައި އޮންނަންޖެހޭނެ ކަމަށެވެ.

މަލީހު އިތުރަށް ފާހަގަކުރެއްވި ގޮތުގައި، ކުރިއަރާފައިވާ މުޖުތަމައުތަކުގައި ވެސް އޮންލައިން އަދި މެނުއަލްކޮށް ފޯމު ހުށަހެޅުމުގެ ފުރުސަތު އޮންނަނީ ހުޅުވާލެވިފައެވެ. އަދި ކެންޑިޑޭޓުންގެ "އީފާސް" އޮންނަންޖެހޭނެ ކަމަށް އީސީން ބުނުމަކީ ޤާނޫނުގައި ނެތް ޝަރުތެއް ކުރިމަތިކުރުވުން ކަމަށް އޭނާ ތުހުމަތު ކުރެއްވިއެވެ.

މި ބައްދަލުވުމުގައި ވާހަކަދައްކަވަމުން ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވީ، އީފާސް ލާޒިމްކުރުމުގެ ބަދަލުގައި އަމަލީ ގޮތުން ފޯމު ހުށަހެޅޭނެ މަގު ފަހިކޮށްދިނުމަށާއި، މިނިވަން ކެންޑިޑޭޓުންނަށް ތާއީދުކުރާ 50 މީހުންގެ ސޮއި ވެސް މެނުއަލްކޮށް ހުށަހެޅޭނެ ގޮތް ހެދުމަށް އީސީގައި އެދިފައިވާނެ ކަމަށެވެ.

ޖަމީލް ވިދާޅުވި ގޮތުގައި މިހާރު އީސީން އަމަލުކުރަމުންދާ ގޮތުގެ ސަބަބުން ބޮޑު ޤާނޫނީ އޮޅުންބޮޅުންގަނޑެއް އުފެދިދާނެއެވެ. ސިޓީ ކައުންސިލްތަކާއި ރަށު ކައުންސިލްތަކުގެ އިތުރުން އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިޚާބަށް ކުރިމަތިލުމުގެ ފުރުސަތު އީސީން މިހާރު ވަނީ ހުޅުވާލާފައެވެ. އެގޮތުން ޖެނުއަރީ 17 އިން ފެށިގެން ފެބްރުއަރީ 1 ވަނަ ދުވަހުގެ 15:30 އާ ހަމައަށް ކުރިމަތިލުމުގެ މުއްދަތު ހަމަވާނެ ކަމަށް އެ ކޮމިޝަނުން ބުނެފައިވެއެވެ.