ބޮލުން އިސްތަށި ފޭބުމަކީ މިއަދު ދުނިޔޭގެ އެކި ކަންކޮޅުތަކުގައި ގިނަ ބަޔަކަށް ދިމާވަމުންދާ ވަރަށް އާންމު މައްސަލައެކެވެ. އުމުރުގެ ހަގު ދުވަސްވަރުގައާއި ދޮށީ އުމުރުގައިވެސް މި މައްސަލަ ދިމާވާއިރު، ގިނަ ފަހަރަށް އަޅުގަނޑުމެން ހީކުރަނީ މިއީ ހަމައެކަނި ބޭނުންކުރާ ޝޭމްޕޫއެއްގެ ސަބަބުން ނުވަތަ މާހައުލަށް އަންނަ ބަދަލެއްގެ ސަބަބުން ދިމާވާ ކަމެއް ކަމަށެވެ. ނަމަވެސް، ހަގީގަތަކީ އަޅުގަނޑުމެންގެ ކެއިންބުއިމުގެ އާދަތަކަކީ އިސްތަށިގަނޑުގެ ދުޅަހެޔޮކަމާ ސީދާ ގުޅިފައިވާ ކަމެއް ކަމެވެ. ބައެއް ކާނާގެ ބާވަތްތަކުގެ ސަބަބުން، ނޭނގި ތިއްބައި އިސްތަށި ފައިބައި، އިސްތަށިގަނޑު ތުނިވުމަށް މަގުފަހިވެއެވެ.

ކެއުމުގައި އަޅުގަނޑުމެން އަދައިގެ މަތިން ބޭނުންކުރާ ކަތަކެތީގެ ތެރެއިން އިސްތަށި ފޭބުމަށް މެދުވެރިވާ އެންމެ ބޮޑު އެއް ބާވަތަކީ ހަކުރު ގިނައިން އެކުލެވޭ ކާނާގެ ބަވަތްތަކެވެ. ހަކުރު ގިނައިން ބޭނުންކުރުމުން ހަށިގަނޑުގެ އިންސިއުލިން މިންވަރު މަތިވެ، އިސްތަށިގަނޑުގެ ބުޑުތަކަށް ލޭ ފޯރުކޮށްދިނުމަށް ހުރަސްއެޅެއެވެ. ނަތީޖާއެއްގެ ގޮތުން އިސްތަށިގަނޑަށް ބޭނުންވާ މުހިންމު ނިއުޓްރިއެންޓުތައް ނުލިބި އިސްތަށިތައް ބަލިކަށިވެ ފައިބަން ފަށައެވެ. މީގެ އިތުރުން މާ ގިނައިން ފޮނި އެއްޗެހި ކެއުމަކީ ބޮލުގެ ހަންގަނޑު ދުޅަވެ، އެގެ ސަބަބުން އިސްތަށި ފައިބަން މެދުވެރިވާ އެއްސަބަބެވެ.

ދެވަނަ ބާވަތަކަށް ފާހަގަކޮށްލެވެނީ ޕްރޮސެސްކޮށްފައިވާ ކާނާ ނުވަތަ "ޖަންކް ފުޑް" އެވެ. މިފަދަ ކާނާގައި ހުންނަ ސެޗުރޭޓެޑް ފެޓްސްގެ ސަބަބުންނާއި، މިކާތަކެތި ތައްޔާރުކުރުމުގައި މާ ގިނައިން ތެޔޮ ބޭނުންކުރުމުގެ ސަބަބުން ބޮލުގެ ހަންގަނޑުގައި ހުންނަ ތެޔޮ އުފައްދާ ގްލޭންޑްތައް މާ ބޮޑަށް ހަރަކާތްތެރިވެ، އިސްތަށިގަނޑުގެ ބުޑުތައް ބެދޭގޮތް ދިމާވެއެވެ. މިއީ އިސްތަށި ފެޅުމަށް ހުރަސްއަޅައި، ހުރި އިސްތަށިތައް ފޭބުމަށް މެދުވެރިވާ ސަބަބެކެވެ. އަދި ޕްރޮސެސްކޮށްފައި ހުންނަ މިފަދަ ކާނާގެ ބާވަތްތަކުގައި ހުންނަ ކެމިކަލްތަކުގެ ސަބަބުން ހޯރމޯންތަކަށް ބަދަލު އައިސް އިސްތަށި ފޭބުން އިތުރުވެއެވެ.

މީގެ އިތުރުން، މާ ގިނައިން ކަނޑު މަހުގެ ބައެއް ބާވަތްތައް ކެއުމަކީ ވެސް ސަމާލުވާންޖެހޭ ކަމެކެވެ. ހާއްސަކޮށް "މާކިއުރީ" ގިނައިން އެކުލެވޭ ބޮޑެތި މަސްމަހުގެ ބާވަތްތައް ކެއުމުން އިސްތަށި ފޭބުމަށް މަގުފަހިވެއެވެ. މާކިއުރީއަކީ ހަށިގަނޑުގައި ހުންނަ ޕްރޮޓީންތަކާ މަސްހުނިވެ، އިސްތަށިގަނޑުގެ ދުޅަހެޔޮކަމަށް ބޭނުންވާ ޒިންކް ފަދަ މާއްދާތައް ހަށިގަނޑަށް ނެގުމަށް ހުރަސްއަޅާ މާއްދާއެކެވެ.

ބޮލުން އިސްތަށި ފޭބުމުގެ މައްސަލައަށް ހައްލެއް ހޯދަން ތަފާތު ބްރޭންޑްތަކުގެ ޝޭމްޕޫއާއި ކޮންޑިޝަނާރ އަދި ސެރަމް ފަދަ ތެލުގެ ތަފާތު ބާވަތްތައް ބޭނުންކުރުމަށް މަސައްކަތް ކުރަމުންދާއިރު، ކެއިން ބުއމުގައި ބޭނުންކުރާ ކާބޯތަކެއްޗަށްވެސް ސަމާލުކަން ދިނުން މުހިންމެވެ. ރީތި އަދި ވަރުގަދަ އިސްތަށިގަނޑެއް ލިބުމަށް އެދޭނަމަ ތަރުކާރީއާއި މޭވާއާއި، އަދި ހަށިގަނޑަށް ފައިދާހުރި ނިއުޓްރިއެންޓްސް އެކުލެވޭ ކާނާ އާދަވެގެން ކޮންމެ ދުވަހަކުވެސް ބޭނުންކުރުމަށް ސަމާލުކަންދޭށެވެ. ކުރު މުއްދަތެއްގެ ތެރޭގައި ނަތީޖާ ފެނިގެންދާނެއެވެ.