ލޭ ހޯދުމުގައި ދިމާވާ ދަތިތަކަށް ހައްލެއް ނުގެނެވިގެން އުޅޭތީ، އެކަމާ ގުޅޭގޮތުން ހެލްތު މިނިސްޓަރ އަބްދުﷲ ނާޒިމް އިބްރާހިމަށް، ގަލޮޅު އުތުރު ދާއިރާގެ މެމްބަރު މުހައްމަދު އިބްރާހިމް (ކުޑޫ) ސުވާލު ފޮނުއްވައިފިއެވެ.

ލިޔުމުން ޖަވާބު ދޭ ގޮތަށް ފޮނުއްވި ސުވާލު ނޯޓިސްގައި ކުޑޫ ވަނީ ސިއްހީ ހިދުމަތް ދިނުމުގެ ގާނޫނާއި ތެލެސީމިއާ ކޮންޓްރޯލްކުރުމުގެ ގާނޫނުގައި ކަނޑައަޅާފައިވާ ގޮތަށް، ސިއްހީ ހިދުމަތްދޭ މަރުކަޒުތަކުން ފޯރުކޮށްދެމުން އަންނަ ލޭގެ ފަރުވާތަކާ ބެހޭ ގައުމީ ނިޒާމު ގާއިމްކޮށް، ތެލެސީމިއާ ކުދިންނަށް ލޭ ހަދިޔާކުރާނެ މީހުންގެ ގޮތުގައި އެ ސެންޓަރަށް ތައާރަފްކޮށްދޭ މީހުން އަދި އެ މީހުންގެ ލޭގެ ތަފްސީލުތައް ހިމެނޭ ދަފްތަރެއް ގާއިމްނުކޮށް ގިނަ ދުވަސްވަނީ ކީއްވެގެންތޯ ސުވާލުކުރައްވާފައެވެ.

އަދި ލޭ ހޯދުމާއި ދިނުމުގައި މިހާރު ދިމާވާ ދަތިތަކަށް ޒަމާނީ ހައްލެއް ނުގެނެވިގެން އުޅެނީ ކީއްވެގެންތޯ ވެސް ކުޑޫގެ ސުވާލުގައި ވެއެވެ.

ލޭ ހޯދުމުގެ މައްސަލަތަކާ ގުޅޭގޮތުން މިނިސްޓަރ ނާޒިމްއާ ސުވާލުކުރައްވާފައި މިވަނީ، ލޭ ލިބުން ދަތިވުމުގެ ސަބަބުން މޯލްޑިވްސް ބްލަޑް ސާވިސް (އެމްބީއެސް) އިން އާއްމުންގެ އެހީއަށް އެދިފައިވާ ދަނޑިވަޅެއްގައެވެ.

އެމްބީއެސް އިން ސޯޝަލް މީޑިއާގައި ހިއްސާކުރި ޕޯސްޓެއްގައި ބުނީ ހުރިހާ ގްރޫޕެއްގެ ލޭ ވެސް ބޭނުންވާ ކަމަށާއި، ރަސްމީ ދުވަސްތަކުގައި ހެނދުނު 8:00 އިން ރޭގަނޑު 8:00 އާ ހަމައަށް ލޭ ހަދިޔާ ކުރެވޭނެ ކަމަށެވެ.