އިންޑިއާގެ ހުޅަނގު ބެންގާލްގައި ނުރައްކާތެރި ނިޕާ ވައިރަސް ފެތުރެން ފެށުމާ ގުޅިގެން، ސަރަހައްދީ ގައުމުތަކުން ރައްކާތެރިކަމުގެ ފިޔަވަޅުތައް ވަރުގަދަކުރަން ފަށައިފިއެވެ. ކޮލްކަޓާ ކައިރިން މި ބަލީގެ ފަސް ކޭސްއެއް ފެނިފައިވާއިރު، އޭގެ ތެރޭގައި ބަލިމީހުންނަށް ފަރުވާދިން ނަރުހުން ވެސް ހިމެނެއެވެ. މި ވައިރަހަކީ މިހާތަނަށް ފަރުވާއެއް ނުވަތަ ވެކްސިނެއް ހޯދިފައިނުވާ، މަރުވުމުގެ ފުރުސަތު ބޮޑު ވައިރަހެކެވެ.

ޗައިނާގެ ނޭޝަނަލް ޑިޒީޒް ކޮންޓްރޯލް އެންޑް ޕްރިވެންޝަން އެޑްމިނިސްޓްރޭޝަނުން 2024 ވަނަ އަހަރުގެ ޑިސެމްބަރު މަހު ނެރުނު މޮނިޓަރ ކުރަންޖެހޭ ބަލިތަކުގެ ލިސްޓުގައި ވެސް ނިޕާ ވައިރަސް ވަނީ ހިމަނާފައެވެ. މި ލިސްޓުގައި ކޮވިޑް-19 އާއި އެޗް.އައި.ވީ ފަދަ ނުރައްކާތެރި ބަލިތައް ވެސް ހިމެނެއެވެ. މީގެ އިތުރުން، ދެކުނު ކޮރެއާއިން ވަނީ މިއީ "ފަސްޓް ޓިއަރ" ނުވަތަ އެންމެ މަތީ ދަރަޖައިގެ ނުރައްކާތެރި ބައްޔެއްގެ ގޮތުގައި ކަނޑައަޅައި، ބަލި ފެންނަ ހިސާބުން ވަގުތުން ރިޕޯޓްކޮށް އެކަހެރިކުރަން ޖެހޭނެ ކަމަށް އަންގާފައެވެ.

މި ވައިރަހުގެ ނުރައްކަލާ ގުޅިގެން ތައިލެންޑުގެ ސުވަރުނަބޫމީ އަދި ފުކެޓް އެއާޕޯޓް ފަދަ ބައިނަލްއަގުވާމީ ވައިގެ ބަނދަރުތަކުގައި، އިންޑިއާގެ ހުޅަނގު ބެންގާލުން އަންނަ ފަސިންޖަރުން ސްކްރީން ކުރަން މިހާރު ވަނީ ފަށާފައެވެ. ސިއްހީ މާހިރުން ވިދާޅުވާ ގޮތުގައި މި ވައިރަހަކީ މައިގަނޑު ގޮތެއްގައި ފުއްޕާމޭގެ ބަލިތަކާއި ސިކުނޑި ދުޅަވުމަށް މެދުވެރިކުރުވާ އެއްޗެކެވެ. ބަލީގެ އަލާމާތްތަކުގެ ތެރޭގައި ހުން އައުން، ބޮލުގައި ރިހުން، ނިދި އައުން، އަދި ހޭނެތުން ހިމެނެއެވެ. މި ބަލި ޖެހޭ މީހުންގެ ތެރެއިން 40 އިންސައްތައަށްވުރެ ގިނަ މީހުން މަރުވާ ކަމަށް ދުނިޔޭގެ ސިއްހަތު ޖަމިއްޔާއިން ހާމަކުރެއެވެ.

ނިޕާ ވައިރަހަކީ ވާލުގެ ޒަރީއާއިން ފެތުރޭ އެއްޗެއް ނަމަވެސް، ބަލިޖެހިފައިވާ މީހެއްގެ ހަށިގަނޑުން ބޭރުވާ ދިޔައިގެ ސަބަބުން އެކަކު އަނެކަކަށް މި ބަލި ފެތުރުމުގެ ފުރުސަތު އޮވެއެވެ. މިހާތަނަށް ފެނުނު ކޭސްތަކާ ގުޅިގެން އިންޑިއާގެ ކަމާބެހޭ ފަރާތްތަކުން ދަނީ ބަލިޖެހުނު މީހުންނާ ބައްދަލުވި މީހުން ދެނެގަނެ، އެމީހުން ކަރަންޓީނު ކުރުމުގެ މަސައްކަތް ވަރުގަދައަށް ކުރަމުންނެވެ.