ތުއްތު ކުއްޖާއި އޭނާގެ މަންމަ ވަކިވާ ވަގުތަކީ އެ ކުއްޖާގެ ހަށިގަނޑަށް ބޮޑެތި ބަދަލުތަކެއް އަންނަ ވަގުތެކެވެ. ދިރާސާތަކުން ދައްކާގޮތުގައި، ތުއްތު ކުއްޖަކަށް އޭނާގެ މަންމަ ނުފެނުމުން ނުވަތަ ކައިރީގައި ނެތްކަން އިހުސާސްވުމުން، އެ ކުއްޖާގެ ސިކުނޑި އެކަން މާނަކުރަނީ ހަމައެކަނި އެކަހެރިވުމެއްގެ ގޮތުގައެއް ނޫނެވެ. އޭގެ ބަދަލުގައި، އެއީ ފުރާނައަށް ނުރައްކާވާ ފަދަ ކުއްލި ހާލަތެއްގެ ގޮތުގައި އެކުއްޖާގެ ސިކުނޑި ދެނެގަނެއެވެ. މީގެ ސަބަބުން ސިކުންތުކޮޅެއްގެ ތެރޭގައި ކުއްޖާގެ ހަށިގަނޑުގައި "ކޯޓިސޯލް" ނުވަތަ ސްޓްރެސް ހޯރމޯންގެ މިންވަރު 300 އިންސައްތައަށް މަތިވެގެންދެއެވެ.

ނޭޝަނަލް ސެންޓަރ ފޯ ބަޔޯޓެކްނޮލޮޖީ އިންފޮމޭޝަން އިން 2023 ވަނަ އަހަރު ޝާއިޢުކޮށްފައިވާ ދިރާސާއެއްގައި ބަޔާންކޮށްފައިވާ ގޮތުގައި، ތުއްތު ކުދިންގެ ހަށިގަނޑުގައިވާ ސްޓްރެސްއަށް އިޖާބަދޭ ނިޒާމަކީ ވަރަށް ނާޒުކު އަދި ހަލުވި ނިޒާމެކެވެ. މަންމައާ ވަކިވާތާ 60 ސިކުންތުވެސް ނުވަނީސް، ކުއްޖާގެ ހަށިގަނޑުގައި ސްޓްރެސް ހޯރމޯން 200 އިންސައްތައާއި 300 އިންސައްތައާ ދެމެދުގެ މިންވަރަކަށް އިތުރުވެއެވެ. މިއީ އެ ކުއްޖާ ގަސްތުގައި ކުރާ ކަމެއް ނޫން ނަމަވެސް، މިއީ އިންސާނާގެ ހަށިގަނޑުގައި ފުރާނަ ސަލާމަތްކުރުމަށްޓަކައި ލައްވާފައިވާ ފިޠުރީ ނިޒާމެކެވެ. މި ނިޒާމުގެ މަގުސަދަކީ ކުއްލި ސަމާލުކަމެއް ހޯދައި، މަންމައާ އަލުން ގުޅުން ގާއިމުކުރުމަށް ބާރުއެޅުމެވެ.

ތުއްތު ކުދިންނަށް "ރައްކާތެރިކަން" އިހްސާސްވަނީ އެކުއްޖެގެ މަންމަ ނުވަތަ އެމަގާމުގެ ވާޖިބު އަދާކުރަމުން އަންނަ ފަރާތުންނެވެ. ވަކިން ޚާއްޞަކޮށް ކުއްޖާއާއި މަންމައާއި ދެމެދު ފިތުރަތުގެ ގޮތުން ލައްވާފައިވާ ޖިސްމާނީ ގާތްކަމުންނެވެ. މަންމަ ތަނަކަށް ދިޔުމުން ނުވަތަ ކުއްޖާ ބަހައްޓާފައި މަންމަ ތަނަކަށް ދާތަންފެނުނަސް ރޯންފަށުމުން އެއީ ބޭރުފުށުން ބަލާއިރު ހަމައެކަނި ކުއްޖާ ބިރުގަނެގެން ރޮނީ ކަމަށް ފެނުނު ކަމުގައިވިޔަސް، މިއީ ބަޔޮލޮޖިކަލް ގޮތުން ސިކުނޑީގައި ހިނގާ ވަރަށް ވަރުގަދަ "އަލާމް" ނިޒާމެކެވެ. މި ދިރާސާއިން އެނގިގެންދަނީ ތުއްތު އުމުރުގައި ކުއްޖާއާއި މަންމައާ ދެމެދު އޮންނަ ގާތްކަމަކީ ކުއްޖާގެ ނަފްސާނީ އަދި ޖިސްމާނީ ދުޅަހެޔޮކަމަށް ކިހާ މުހިންމު ކަމެއް ކަމެވެ. މިފަދަ އިހުސާސްތަކަކީ ކުއްޖާގެ މިޒާޖާ ގުޅިފައިވާ ކަމެއް ނޫން ކަމާއި، އެއީ ސިކުނޑީގެ ނިއުރޯބަޔޮލޮޖީއާ ގުޅިފައިވާ ފުން އަސަރުތަކެއްކަން ދިރާސާވެރިން ވަނީ ފާހަގަކޮށްފައެވެ.