އިންޑިއާގެ މަހާރާޝްޓްރާ ސްޓޭޓްގެ ޑެޕިއުޓީ ޗީފް މިނިސްޓަރު އަޖިތު ޕަވާރު ދަތުރުކުރެއްވި ޗާޓަރު މަތިންދާބޯޓު، ޕޫނޭގެ ބާރާމަތީ އެއާޕޯޓަށް ޖައްސަން އުޅުމުގެ ތެރޭގައި މިއަދު ހިނގި ނުރައްކާތެރި އެކްސިޑެންޓުގައި އޭނާ މަރުވެއްޖެއެވެ. ވީއެސްއާރު ވެންޗާސްއިން އޮޕަރޭޓްކުރާ ލިއަރޖެޓް 45 އެކްސް އާރު މަރުކާގެ މި ބޯޓު ވެއްޓުނީ ބާރާމަތީ އެއާޕޯޓަށް ޖައްސަން އުޅުމުގެ ތެރޭގައި ދިމާވި ފަންނީ މައްސަލަތަކެއްގެ ސަބަބުން ކަމަށް ރިޕޯޓްތައް ބުނެއެވެ.

މި ހާދިސާ ހިނގާފައިވަނީ މިއަދު ހެނދުނު ގާތްގަނޑަކަށް 8:45 ހާއިރުއެވެ. ޑައިރެކްޓަރޭޓް ޖެނެރަލް އޮފް ސިވިލް އޭވިއޭޝަން އިން މަޢުލޫމާތު ދޭ ގޮތުގައި، ބޯޓު ރަންވޭއަށް ތިރިކުރި ވަގުތު ބޯޓުގެ ކޮންޓްރޯލް ގެއްލި، "ސިވިއަރ ޓެކްނިކަލް ޑިފިކަލްޓީޒް" ތަކެއް ކުރިމަތިވިއެވެ. ބޯޓު ރަންވޭއަށް ޖެއްސުމަށްފަހު، ރަންވޭއިން ކަސިޔާރުވެގެން ގޮސް ކައިރީގައި އޮތް ދަނޑަކަށް ވަދެ، ބޯޓުގައި ބާރުގަދަ ގޮވުމެއް ގޮވައި އަލިފާން ރޯވީއެވެ.

މި ހާދިސާ ލޮލުން ދުށް މީހުން ބުނި ގޮތުގައި، ބޯޓު ޖައްސަން އުޅުނުއިރު ބޯޓުން އާދަޔާ ހިލާފު ބާރު އަޑުތަކެއް އިވެމުންދިޔައެވެ. އަދި ބޯޓު ކޮންޓްރޯލުން ނެއްޓި، ބާރު މިނުގައި ގޮސް ބިމުގައި ޖެހުމާއެކު ބޮޑު ގޮވުމެއް ގޮވީއެވެ. ބައެއް ރިޕޯޓްތައް ބުނާ ގޮތުގައި، މި އެކްސިޑެންޓް ހިނގީ ބޯޓު ދެވަނަ ފަހަރަށް ޖައްސަން ކުރި މަސައްކަތުގެ ތެރޭގައެވެ. މި ހިތާމަވެރި ހާދިސާގައި އަޖިތު ޕަވާރުގެ އިތުރުން ބޯޓުގައި ތިބި އެހެން މީހުންވެސް ވަނީ މަރުވެފައެވެ.