އަންނަ އޭޕްރީލް 4 ގައި ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބުގައި ވާދަކުރާ ކެންޑިޑޭޓުންގެ ފޯމުތައް ކަރުދާހުން ބަލައިގަތުމުގެ އެއްވެސް ވިސްނުމެއް ނެތް ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.

އިލެކްޝަންސް ކޮމިޝަނުން މިހެން ބުނެފައިވަނީ، އީފާސް މެދުވެރިކޮށް ހަމައެކަނި އޮންލައިންކޮށް ފޯމު ހުށަހަޅަން ޖެހޭ ގޮތަށް އޮތުމުންނާއި، ފޯމު ހުށަހެޅުމަށް ދީފައިވާ މުއްދަތު ކުރުވުމުގެ ސަބަބުން ބައެއް ސިޔާސީ ޕާޓީތަކުން ކަންބޮޑުވުން ފާޅުކުރަމުންދާ ދަނޑިވަޅެއްގައެވެ.

މިކަމާ ގުޅޭގޮތުން އިލެކްޝަންސް ކޮމިޝަންގެ ނައިބު ރައީސް ޢަބްދުއްރަޙްމާން ޞަލާހު ރަޝީދު ވިދާޅުވީ، ކޮމިޝަންގެ މައި ޕޯޓަލް މެދުވެރިކޮށް ފޯމު ހުށަހެޅުމުގެ ފުރުސަތު ހުޅުވާލި ފަހުން މިހާތަނަށް 2،200 އަށްވުރެ ގިނަ ފޯމު ހުށަހަޅާފައިވާ ކަމަށެވެ. އަދި ފޯމު ހުށަހެޅުމުގައި އުނދަގޫތަކެއް ކުރިމަތިވާކަން ކޮމިޝަނާ ހިއްސާކޮށްފައި ނުވާކަމަށް އޭނާ ވިދާޅުވިއެވެ.

ޞަލާހު ވިދާޅުވީ، އޮންލައިންކޮށް ފޯމު ހުށަހެޅުމަކީ ކުރިމަތިލާ ކެންޑިޑޭޓުންނަށް ލިބޭ ވަރަށް ބޮޑު ލުޔެއް ކަމަށާއި، އެގޮތުން އެމަސައްކަތަށް ހޭދަކުރަންޖެހޭ ވަގުތު ކުރުވުމާއި، ފޯމަށް އަންނަ އަޕްޑޭޓްތައް ޕޯޓަލް މެދުވެރިކޮށް ވަގުތުން ބަލާލެވޭނެކަން އޭނާ ފާހަގަ ކުރެއްވިއެވެ.

ހަމައެއާއެކު ކެންޑިޑޭޓުން ހުށައަޅާ ލިޔެކިޔުންތަކުގެ ސައްޙަކަން ފަސޭހަކަމާއެކު ކަށަވަރު ކުރެވޭނެ ކަމަށާއި، ފޯމުތަކަށް ޖަވާބު ދިނުން ވެސް އަވަސްވެގެންދާނެ ކަމަށް ޞަލާޙް ވިދާޅުވިއެވެ.

ލޯކަލް ކައުންސިލް އިންތިޚާބަށް ކުރިމަތިލުމުގެ ފުރުސަތު އީސީން ހުޅުވާލާފައިވަނީ މި މަހުގެ 17 ވަނަ ދުވަހުއެވެ. ފޯމު ހުށަހެޅުމުގެ އެންމެ ފަހު ވަގުތަކީ އަންނަ މަހުގެ 1 ވާ ބުދަ ދުވަހުގެ މެންދުރުފަހު 3:30 އެވެ.