އަންނަ އެޕްރިލް މަހު އޮންނަ ލޯކަލް ކައުންސިލް އިންތިހާބަަށް ކުރިމަތިލާން ފޯމް ހުށަހަޅަން ކޮންމެ ދުވަހަކު ދޭ ވަގުތު އިލެކްޝަންސް ކޮމިޝަން (އީސީ) އިން އިތުރުކޮށްފިއެވެ.

އިލެކްޝަންސް ކޮމިޝަނުން ކައުންސިލް އިންތިހާބުގައި ވާދަކުރަން ފޯމު ހުށަހަޅަން ހުޅުވާލީ މިމަހުގެ 17 އިން އަންނަ މަހުގެ ފުރަތަމަ ދުވަހާ ހަމައަށެވެ. ފޯމް ހުށައަޅަން އޭރު ހުޅުވާލި އިރު، ހުކުރު ދުވަސް ފިޔަވައި އެހެން ދުވަސްތަކުގައި ފޯމް ހުށަހެޅޭނީ ހެނދުނު 8:30 އިން މެންދުރު ފަހު 3:30 އަށް ކަމަށް އީސީން ވަނީ ބުނެފައެވެ. އަދި ހުކުރު ދުވަހު ފޯމު ހުށަހެޅޭނީ މެންދުރުފަހު 3:30 އިން 5:30 އަށް ކަމަށްވެސް އީސީން ވަނީ ބުނެފައެވެ.

ނަމަވެސް ފޯމު ހުށަހަަޅުމުގެ ސުންގަޑި ހަމަވާން އެންމެ 4 ދުވަހަށް ވެފައިވަނިކޮށް، އީސީން މިއަދު މިވަނީ ކޮންމެ ދުވަހަކު ވެސް ފޯމް ހުށަހަޅަންލިބޭ ގަޑި އިތުރުކޮށްފައެވެ. އެގޮތުން މިހާރު ހުކުރު ދުވަސް ފިޔަވައި އެހެން ދުވަސްތަކުގައި ހެނދުނު 8:30 އިން ހަވީރު 5:30 އަށް ފޯމު ހުށަހެޅޭނެ ކަމަށް އީސީން ހާމަކުރިއެވެ. އަދި ހުކުރު ދުވަހު ފޯމު ހުށަހެޅޭނީ މެންދުރުފަހު 3:30 އިން ރޭގަނޑު 8:00 އަށް ކަމަށްވެސް އެ ކޮމިޝަނުން ހާމަކުރިއެވެ.

ފޯމު ހުށަހަޅަން ކޮންމެ ދުވަހަކު އޮންނަ ވަގުތު އީސީން އިތުރުކޮށްފައި މިވަނީ، ފޯމު ހުށަހެޅުމަށް ދީފައިވާ ވަގުތު ކުޑަކަމަށް ބުނެ، އެ މުއްދަތު އިތުރުކޮށްދޭން އިދިކޮޅު އެމްޑީޕީން އެދިފައިވަނިކޮށެވެ.

ލޯކަލް ކައުންސިލް އޮންތިހާބު އޮންނާނީ އެޕްރިލް 4 ގައެވެ. މި އިންތިހާބުގައި ޖުމްލަ 225 ދާއިރާއަކުން، ލޯކަލް ކައުންސިލްތަކާއި ޑަބްލިއުޑީސީއަށް މެންބަރުން އިންތިހާބުކުރާނެއެވެ. އިންތިހާބުގައި ވޯޓުލުމަށް ޖުމްލަ 621 ވޯޓު ފޮށި ބެހެއްޓުމަށް ވަނީ ނިންމާފައެވެ.