މިހާރު އިންޑިއާގެ ވެސްޓް ބެންގޯލްގައި ފެތުރެމުންދާ ނިޕާ ވައިރަސް އާ ގުޅިގެން ސިއްހީ މާހިރުން އަންނަނީ ކަންބޮޑުވުން ފާޅުކުރަމުންނެވެ. މި ބައްޔަކީ ވާލުގެ ޒަރީއާއިން އިންސާނުންގެ ގަޔަށް އަރާ، ފުރާނައަށް ނުރައްކާތެރި ބައްޔެކެވެ. އިނގިރޭސިވިލާތުގެ ހެލްތު ސެކިއުރިޓީ އެޖެންސީ އިން ހާމަކޮށްފައިވާ ގޮތުގައި، މި ބަލި ޖެހޭ މީހުންގެ ތެރެއިން 40 އިންސައްތައާއި 75 އިންސައްތައާ ދެމެދުގެ އަދަދަކަށް މީހުން މަރުވުމުގެ ފުރުސަތު އޮވެއެވެ.

ނިޕާ ވައިރަހުގެ އަލާމާތްތައް އާންމުކޮށް ފެންނަން ފަށަނީ ބަލިޖެހޭތާ 4 ދުވަހާއި 21 ދުވަހާ ދެމެދުގެ މުއްދަތެއްގައެވެ. ބަލީގެ ކުރީކޮޅު ފެންނަ އަލާމާތްތަކުގެ ތެރޭގައި ކުއްލިއަކަށް ހުން އައުމާއި، ރޯގާގެ އަލާމާތްތައް ފެނުމާއި، ނިއުމޯނިއާ ނުވަތަ ނޭވާލާ ނިޒާމުގެ މައްސަލަތައް ކުރިމަތިވުން ހިމެނެއެވެ. ބަލި ބޮޑުވާ ހާލަތްތަކުގައި ސިކުނޑި ދުޅަވުން ނުވަތަ މެނިންޖައިޓިސް ފަދަ ނުރައްކާތެރި ކަންކަން މެދުވެރިވެއެވެ. މިފަދަ ނުރައްކާތެރި އަލާމާތްތައް އާންމުކޮށް ފެންނަނީ ބަލިޖެހޭތާ 3 ދުވަހާއި 21 ދުވަހާ ދެމެދުގައެވެ.

މި ބަލިން ސަލާމަތްވާ ބައެއް މީހުންނަށް ދާއިމީ ނަފްސާނީ އަދި ނާރުގެ މައްސަލަތައް ކުރިމަތިވެއެވެ. އޭގެ ތެރޭގައި ދާއިމީކޮށް ފިޓުޖެހުމާއި، މިޒާޖަށް ބަދަލު އައުން ހިމެނެއެވެ. އަދި މަދު ހާލަތްތަކުގައި ބަލި ރަނގަޅުވި ނަމަވެސް، މަސްތަކެއް ނުވަތަ އަހަރުތަކެއް ފަހުން އަލުން ވައިރަސް ހަށިގަނޑުގައި ހަރަކާތްތެރިވުމަކީ އެކަށީގެންވާ ކަމެކެވެ.

މި ވައިރަސް އާންމުކޮށް ފެތުރެނީ ބަލިޖެހިފައިވާ ވާލުގެ ކުޑަކަމުދާ ތަކެއްޗާއި، ބޮޑުކަމުދާ ތަކެތި ނުވަތަ ކުޅު ޖެހިފައި ހުންނަ މޭވާ ނުވަތަ މޭވާގެ ބާވަތްތައް ބޭނުންކުރުމުންނެވެ. މީގެ އިތުރުން ބަލިޖެހިފައިވާ މީހެއްގެ ހަށިގަނޑުން ބޭރުވާ ދިޔާ ތަކެތީގެ ޒަރީއާއިންނާއި، ބަލި މީހާއާ ގާތްކޮށް އުޅޭ މީހުންގެ ގަޔަށް ވެސް މި ބަލި އަރާފާނެއެވެ. އިންޑިއާއާއި ބަންގްލަދޭޝްގައި މި ބަލި ފެތުރިފައިވަނީ ބަލި މީހުންނަށް އެހީތެރިވާ އާއިލާގެ މީހުންނާއި ސިއްހީ ހިދުމަތްތެރިންގެ މެދުގައެވެ.

ހިތާމައަކީ، މިހާތަނަށް ނިޕާ ވައިރަހަށް ހާއްސަ ފަރުވާއެއް ނުވަތަ ބަލިން ރައްކާތެރިވުމަށް ބޭނުންކުރާނެ ވެކްސިނެއް އުފެއްދިފައި ނުވުމެވެ. އެހެންކަމުން، ރައްކާތެރިކަމުގެ ފިޔަވަޅު އެޅުމަކީ މި ބަލިން ސަލާމަތްވުމަށް އޮތް ހަމައެކަނި ގޮތެވެ. އެހެންކަމުން މޭވާ ފަދަ ތަކެތި ކެއުމުގެ ކުރިން ރަނގަޅަށް ދޮވެގެން ބޭނުންކުރުމަށާއި ވާލު ތުންޖައްސާފައި ނުވަތަ ކައިފައި ހުންނަ މޭވާތައް ބޭނުން ނުކުރުމަށް ބޮޑު ސަމާލުކަން ދިނުން ވަރަށް މުހިއްމެވެ.