ގިރާވަރުފަޅުގެ ލޭންޑް ޔޫސް ޕްލޭނަށް ގެނައި ބަދަލުތަކާއެކު، ބިންވެރިޔާ ސްކީމުގެ ދަށުން ގޯތި ލިބިފައިވާ ފަރާތްތަކުގެ މެދުގައި އަލުން ގުރުއަތުލުން ބޭއްވުމަށް ނިންމައިފިއެވެ.

ހައުސިންގ މިނިސްޓްރީން ބުނީ، ގޯތިތަކުގެ ލޮޓު ނަންބަރު ކަނޑައެޅުމަށް ބާއްވާ ގުރުއަތުލުން އޮންނާނީ އަންނަ ހޮނިހިރު ދުވަހުގެ ހެނދުނު 9:30 ގައި ސޯޝަލް ސެންޓަރުގައި ކަމަށެވެ. މި ބަދަލު ގެންނަން ޖެހުނީ ކުރިން އާންމުކޮށްފައިވާ ލޭންޑް ޔޫސް ޕްލޭނުގައި، ދޫކުރަންޖެހޭ އަދަދަށް ވުރެ 610 ގޯތި މަދުވުމާ ގުޅިގެންނެވެ.

އެހެންކަމުން، މިހާރު އަލުން އެކުލަވާލާފައިވާ ޕްލޭނުގައި ގިރާވަރުފަޅުން ދޫކުރާ ޖުމްލަ 4،072 ގޯތި ވަނީ ހިމަނާފައެވެ. މީގެ ތެރޭގައި ހިމެނެނީ 1،250 އަކަފޫޓުގެ 2،603 ގޯއްޗާއި، 1،650 އަކަފޫޓުގެ 1،214 ގޯއްޗާއި، 2،050 އަކަފޫޓުގެ 254 ގޯތީގެ އިތުރުން 2،450 އަކަފޫޓުގެ އެއް ގޯއްޗެވެ. ގުރުއަތުލުން ކުރިއަށްދާ ގޮތާ ބެހޭގޮތުން ހައުސިން މިނިސްޓްރީން ބުނީ، ގުރުނެގުމުގެ ކަންކަން ކުރިއަށް ގެންދާނީ މިނިސްޓްރީގެ މުވައްޒަފުން ކަމަށެވެ.

ގުރުއަތުލުން ބާއްވާ މާލަމަށް ވަދެވޭނީ ގޯތި ލިބިފައިވާ ކޮންމެ ފަރާތަކުން އެކަކަށް ކަމަށްވީ ނަމަވެސް، ގުރުއަތުން ހަމަޖެހޭ ބިންތަކުގެ މައުލޫމާތު 'ހިޔާވެހި' ޕޯޓަލް މެދުވެރިކޮށް ވަގުތުން ފެންނަން ހުންނާނެއެވެ. އަދި ގޯތި ލިބޭ ފަރާތްތަކަށް އެސްއެމްއެސްގެ ޒަރިއްޔާއިންވެސް އެ މައުލޫމާތު ހިއްސާކުރާނެ ކަމަށް އެ މިނިސްޓްރީން މައުލޫމާތު ދީފައިވެއެވެ.

މި މަރުހަލާ ނިމުމުން، ގޯތި ހަވާލުކުރުމުގެ އެއްބަސްވުމުގައި ސޮއިކުރުމާއި ގޯތީގެ ރަޖިސްޓަރީ ދޫކުރުމުގެ މަސައްކަތްތައް ކުރިއަށްދާނެ ގޮތުގެ ތަފްސީލުތައް ފަހުން އިއުލާނު ކުރާނެ ކަމަށްވެސް ހައުސިން މިނިސްޓްރީން ވަނީ ހާމަކޮށްފައެވެ.