މެދުއިރުމަތީގައި މަސްލަހަތު ގޯސްވެ، ބޮޑު ހަނގުރާމައެއްގެ ބިރު ހީވެފައިވާ މި ދަނޑިވަޅުގައި، އެމެރިކާގެ ރައީސް ޑޮނަލްޑް ޓްރަމްޕްގެ އިންޒާރުތަކަށް އީރާނުން ވަރުގަދަ ރައްދެއް ދީފިއެވެ.

އީރާނުގެ ނިއުކްލިއާ މަޝްރޫއު ވަގުތުން ހުއްޓާލުމަށާއި، އިސްރާއީލުގެ ސަލާމަތަށް ނުރައްކާވާ ފަދަ އެއްވެސް އަމަލެއް ނުހިންގުމަށް ޓްރަމްޕް އަމުރުކުރެއްވުމާ ގުޅިގެން، އީރާނުން ބުނެފައިވަނީ ޓްރަމްޕަކީ އެ ގައުމަށް "ސުމެއް" ކަމަށާއި އޭނާގެ އިންޒާރުތަކަށް އެއްވެސް ޖެހިލުމެއް ނުވާ ކަމަށެވެ.

ވޮޝިންޓަނުން ބުނާ ގޮތުގައި، އީރާނުން ޔުރޭނިއަމް މުއްސަނދިކުރުން ހުއްޓާލައި، ނިއުކްލިއާ މަރުކަޒުތައް ރޫޅާލަން ޖެހެނީ އެ ގައުމުން ނިއުކްލިއާ ހަތިޔާރު އުފެއްދުން ހުއްޓުވުމަށާއި ސަރަހައްދީ މަސްލަހަތު ހިމާޔަތްކުރުމަށެވެ.

މީގެ އިތުރުން ހިޒްބުالله، ހަމާސް އަދި ހޫޘީން ފަދަ ޖަމާއަތްތަކަށް ވާގިވެރިވުން ހުއްޓާލުމަށާއި، މިސައިލް ޕްރޮގްރާމްތައް ދަށްކުރުމަށް ވެސް ޓްރަމްޕްގެ ޓީމުން ވަނީ ޝަރުތުކޮށްފައެވެ. ނަމަވެސް އީރާނުން ވަނީ މި ހުރިހާ ޝަރުތުތަކަކަށް ސީދާ ދެކޮޅު ހަދައި، އެއީ ގައުމުގެ ދާޚިލީ ކަންކަމާ ބެހުން ކަމަށް ސިފަކޮށްފައެވެ.

މި މައްސަލައިގައި ވާހަކަދައްކަމުން އީރާނުން ބުނީ، އެމެރިކާއިން ކިތަންމެ ބޮޑު ބިރެއް ދެއްކި ނަމަވެސް އެ ގައުމު ސިހޭނެ ގޮތެއް ނުވާނެ ކަމަށާއި، އެމީހުން ބިރުގަންނަނީ ހަމައެކަނި މާތްﷲ ދެކެ ކަމަށެވެ.

އީރާނުގެ ސުޕްރީމް ލީޑަރު އަޔާތުالله އަލީ ޚާމަނާއީ ވަނީ ބޭރުގެ ބާރުތަކުން އީރާނުގެ މިނިވަންކަމަށް އަރައިގަތުމަށް ކުރާ މަސައްކަތް ބަލައިނުގަނެވޭނެ ކަމަށް ވިދާޅުވެ، ޓްރަމްޕަށް ވަރުގަދަ ރައްދެއް ދެއްވާފައެވެ. މި ކުރިމަތިލުންތަކުގެ ސަބަބުން ސަރަހައްދީ ގައުމުތައް އޮތީ ނުތަނަވަސްކަމެއްގެ ތެރޭގައެވެ.