ފުވައްމުލައް ސިޓީގައި ބަނގުރާ އުފައްދާ ކަމަށް ބެލެވޭ ތަކެތި ފުލުހުން ހޯދައި، އެ ތަކެތި ފުލުހުންގެ ބެލުމުގެ ދަށަށް ގެންގޮސްފިއެވެ.

ފުލުހުން ބުނީ، މި ތަކެތި ހޯދާފައިވަނީ މަސްތުވާތަކެއްޗާއި ބަނގުރަލާ ދެކޮޅަށް ފުވައްމުލައް ސިޓީ ފުލުހުން ކުރަމުންދާ މަސައްކަތްތަކުގެ ދަށުން ކަމަށެވެ. އެގޮތުން މި މަހުގެ 29 ވަނަ ދުވަހު ހިންގި މި އޮޕަރޭޝަންގައި، އެ ސިޓީގެ އެކި ސަރަހައްދުތަކުގެ ވަލުތެރެ ބަލައި ފާސްކޮށްފައިވެއެވެ.

މި އޮޕަރޭޝަންގައި ބަނގުރާ ކަމަށް ބެލެވޭ އެއްޗެއް ހުރި ފުޅިތަކަކާއި، ގިނަ އަދަދެއްގެ ހަންތަކެއް ފުލުހުން ވަނީ ހޯދާފައެވެ. މީގެ އިތުރުން، ބަނގުރާ އުފެއްދުމަށް ބޭނުންކުރާ ކަމަށް ބެލެވޭ އެކި ބާވަތުގެ ސާމާނުވެސް ވަލުތެރޭގައި ފޮރުވާފައި ހުއްޓާ ފުލުހުން ވަނީ ހޯދާފައެވެ.

ފުލުހުން ބުނީ މި މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވާ ކަމަށެވެ. ނަމަވެސް، ފުވައްމުލައް ސިޓީ ޕޮލިސް ސްޓޭޝަނުން މިހާރު ދަނީ މި މައްސަލަ އިތުރަށް ތަހުގީގު ކުރަމުންނެވެ.

މި ސަރުކާރުން މަސްތުވާތަކެއްޗާއި ބަނގުރަލުގެ ވަބާއިން މުޖުތަމައު ސަލާމަތްކުރުމަށް ކުރަމުންދާ މަސައްކަތުގެ ދަށުން، ރާއްޖޭގެ އެކި ކަންކޮޅުތަކުގައި ފުލުހުން ދަނީ މިފަދަ ހާއްސަ އޮޕަރޭޝަންތައް ހިންގަމުންނެވެ.