ފުޓުބޯޅަ އެސޯސިއޭޝަން (އެފްއޭއެމް)ގެ ފައިސާއަށް ޚިޔާނަތްތެރިވި މައްސަލައިގައި، އެ އިދާރާގެ ކުރީގެ ރައީސް ބައްސާމް އަދީލް ޖަލީލުގެ މައްޗަށް ކުރާ ދައުވާތަކާ ގުޅިގެން އިންޓަރޕޯލްގެ ރެޑްނޯޓިސް ނެރެގެން ހޯދަމުންދިޔަ އެފްއޭއެމްގެ ކުރީގެ ފައިނޭންސް ހެޑް، މުހައްމަދު އަގީލް ތައިލޭންޑްގެ ބެންކޮކުން އިއްޔެ ހައްޔަރުކޮށްފިއެވެ.

އަގީލް ހައްޔަރުކޮށްގެން ކޯޓަށް ހާޒިރުކުރުމަށް ފުލުހުންގެ މައްޗަށް އަމުރު ނެރެފައިވަނީ، ބައްސާމްގެ މައްޗަށް ކުރެވޭ ޚިޔާނާތުގެ މައްސަލައިގައި ހެކިބަސް ނެގުމަށެވެ. އޭގެއިތުރުން އަގީލްގެ މައްޗަށްވެސް މި މައްސަލައިގައި މަނީ ލޯންޑްރިން އާއި ޓެރަރިޒަމަށް ފައިނޭންސްކުރުން ހުއްޓުވުމުގެ ގާނޫނުގެ 53 ވަނަ މާއްދާގެ ދަށުން، މަނީ ލޯންޑާކުރުމަށް އެހީތެރިވުމުގެ ކުށުގެ ދައުވާ އުފުލާފައިވެއެވެ.

ފުލުހުން އިއްޔެ ބުނީ، އަގީލް ތައިލޭންޑްގައި ހިފަހައްޓާފައިވަނީ ވިސާގެ މައްސަލައަކާ ގުޅިގެންނެވެ. އޭނާ ހޯދުމަށް އިންޓަޕޯލް ރެޑް ނޯޓިސްއެއް ނެރެފައިވުމާއެކު، ތައިލޭންޑުގެ ކަމާބެހޭ އިދާރާތަކުން ވަނީ އެކަން ދިވެހި ފުލުހުންނަށް އަންގާފައެވެ. މިހާރު ފުލުހުން ދަނީ އޭނާ ރާއްޖެ ގެނައުމުގެ މަސައްކަތް ކުރަމުންނެވެ.

މީގެ ކުރިން ބައްސާމްގެ މައްސަލައިގައި ކޯޓުގައި ހެކިބަސް ދެމުން އަގީލް ބުނެފައިވަނީ، ބައްސާމް މަހަކު 5،000 ޑޮލަރުގެ އެލަވަންސެއް ނަންގަވަމުން ގެންދެވި ކަމަށެވެ.

އެފްއޭއެމްގެ ފައިސާއަށް ޚިޔާނަތްތެރިވި މައްސަލައިގައި ބައްސާމް އަދީލް ޖަލީލް މިހާރު ގެންދަނީ 32 އަހަރުގެ ޖަލު ހުކުމެއް ތަންފީޒު ކުރަމުންނެވެ. އެއީ ޚިޔާނާތުގެ މައްސަލައިގައި އިއްވާފައިވާ 4 އަހަރުގެ ހުކުމަކާއި 8 އަހަރުގެ ޙުކުމަކާއި، މަނީ ލޯންޑްރިންގެ މައްސަލައިގައި އިއްވާފައިވާ 5 އަހަރުގެ ހުކުމަކާއި، 15 އަހަރުގެ ޙުކުމެކެވެ.