ގައުމެއްގައި ސުލްހަ މަސަލަސްކަން ދެމެހެއްޓޭނީ، ހާމަކަން ބޮޑު ޖަވާބުދާރީވަނިވި ވެރިކަމެއްގެ ތެރެއިން ރައްޔިތުންގެ އިތުބާރު ހޯދައިގެން ކަމަށް ރައްޔިތުންގެ މަޖިލީހުގެ ނައިބު ރައީސް އަހްމަދު ނާޒިމް ވިދާޅުވެއްޖެއެވެ. ނާޒިމް މިހެން ވިދާޅުވީ ޕާކިސްތާނުގައި މިހާރު ކުރިއަށްދާ ކޮމަންވެލްތު ޕާލިމެންޓަރީ އެސޯސިއޭޝަން (ސީޕީއޭ) ގެ ބައިނަލްއަގުވާމީ ކޮންފަރެންސްގައި "ސުލްހައާއި ދީމިގްރާތީ އިތުބާރު: ސުލްހަވެރިކަން ގާއިމުކުރުމުގެ އިންޖީނެއްގެ ގޮތުގައި ގާނޫނުހަދާ މަޖިލިސްތައް" މި މައުޟޫއަށް ތަގުރީރު ކުރައްވަމުންނެވެ.

ނާޒިމްގެ ތަގުރީރުގައި ފާހަގަކުރެއްވި ގޮތުގައި، ސުލްހައަކީ ހަމައެކަނި ހަނގުރާމައެއް ނެތުން ނޫން ކަމަށާއި، އެއީ ހުރިހާ އެންމެން ޝާމިލުވާ، ދެފުށް ފެންނަ ނިޒާމެއްގެ ތެރެއިން ގާއިމުކުރެވޭނެ ކަމެކެވެ. ވަކިން ހާއްސަކޮށް ދެކުނު އޭޝިއާގެ ސަރަހައްދުގައި ރައްޔިތުންގެ އިތުބާރު ކުޑަވުމަކީ ބައިބައިވުމާއި ހަލަބޮލިކަމަށް މަގުފަހިވާނެ ކަމެއްގެ ގޮތުގައި އޭނާ ފާހަގަކުރެއްވިއެވެ. މިފަދަ ހާލަތްތަކުގައި ޚިޔާލުތަފާތުވުންތައް ހައްލުކޮށް މަޝްވަރާގެ މަގު އިޚްތިޔާރު ކުރުމުގައި ގާނޫނުހަދާ މަޖިލިސްތަކުން އަދާކުރާ ދައުރު ވަރަށް މުހިންމު ކަމަށްވެސް ނާޒިމް ވިދާޅުވިއެވެ.

ރާއްޖޭގެ ތަޖުރިބާ ހިއްސާ ކުރައްވަމުން ނާޒިމް ވިދާޅުވީ، 2008 ވަނަ އަހަރު ރާއްޖެއަށް އައި ޑިމޮކްރެޓިކް ބަދަލާއެކު ދައުލަތް ހިންގުމާއި ފާރަވެރިވުމުގެ މައި ތަނބަކަށް ރައްޔިތުންގެ މަޖިލިސް ވެފައިވާ ކަމަށެވެ. އެގޮތުން، ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ގާނޫނާއި، އެންޓި ޓޯޗާ ގާނޫނު ފަދަ މުހިންމު ގާނޫނުތައް ފާސްކޮށް، ގާނޫނުގެ އިސްލާހީ ވެރިކަން ދެމެހެއްޓުމަށް މަޖިލީހުން ބޮޑެތި މަސައްކަތްތަކެއް ކޮށްފައިވާކަން އޭނާ ފާހަގަކުރެއްވިއެވެ.

މީގެ އިތުރުން، ސުލްހައަކީ ބާރުގެ ބޭނުންކޮށްގެން މަޖުބޫރުން ކުރުވޭނެ ކަމެއް ނޫން ކަމަށާއި، އެއީ މެދުނުކެނޑި ކުރެވޭ އިޚުލާސްތެރި މަސައްކަތްތަކުން ބިނާކުރެވޭ އިތުބާރެއް ކަމަށް ނާޒިމް ވިދާޅުވިއެވެ. މި ދަތުރުފުޅުގެ ތެރެއިން، ސީޕީއޭ އޭޝިއާ ސަރަހައްދުގެ ރިޔާސަތު 71 ވަނަ ކޮމަންވެލްތު ޕާލިމެންޓަރީ ކޮންފަރެންސާ ހަމައަށް ރާއްޖޭގެ ރައްޔިތުންގެ މަޖިލީހާ މިހާރު ވަނީ ރަސްމީކޮށް ހަވާލުކޮށްފައެވެ.