އެފްއޭއެމްގެ ފައިސާއަށް އެއިދާރާގެ ކުރީގެ ރައީސް ބައްސާމް އިސްވެ ހުންނަވައި ޚިޔާނާތްތެރިވި މައްސަލާގައި އަމީން ކޮންސްޓްރަކްޝަން ޕްރައިވްޓް ލިމިޓެޑްގެ މައްޗަށް ދައުލަތުން އުފުލި މަނީ ލޯންޑަރ ކުރުމަށް އެހީތެރިވުމުގެ ކުށުގެ ދަޢުވާ ސާބިތުނުވާކަމަށް ކްރިމިނަލް ކޯޓުން ކުރި ޙުކުމް ހައި ކޯޓުގައި އިސްތިއުނާފްކޮށްފިއެވެ.

މި މައްސަލަ އިސްތިއުނާފް ކުރުމަށް ޕްރޮސިކިއުޓަރ ޖެނެރަލްގެ އޮފީހުން ހައިކޯޓަށް ހުށަހަޅާފައިވަނީ 2 މާރިޗު 2026 ގައެވެ.

މި މައްސަލާގައި ކްރިމިނަލް ކޯޓުން 6 ޖަނަވަރީ 2025 ގައި ނިންމި ނިންމުން ދިރާސާކުރުމަށްފަހު ޕީޖީ އޮފީހުން ބުނީ، ދައުލަތުން ހުށަހެޅި ގިނަ ހެކިންގެ ހެކިބަސް ނުނެގުމަށް ކޯޓުން ނިންމާފައިވަނީ ޝަރުޢީ އަދި ޤާނޫނީ އުޞޫލުތަކާ ޚިލާފަށް ކަމަށެވެ. އަދި މައްސަލައިގެ ހެކި ޤަރީނާ ވަޒަންކުރުމުގައިވެސް ޤާނޫނީ އުޞޫލުތަކާ ޚިލާފުވެފައިވާކަމަށް އެ އޮފީހުން ދެކެއެވެ.

ހައި ކޯޓަށް ހުށަހެޅި އިސްތިއުނާފީ މައްސަލާގައި ދައުލަތުން އެދިފައިވަނީ ކްރިމިނަލް ކޯޓުގެ ނިންމުން ބާޠިލުކޮށް، އެ މައްސަލަ އަލުން ބެލުމަށްޓަކައި އަނބުރާ ކްރިމިނަލް ކޯޓަށް ތަޙްވީލު ކޮށްދެއްވުމަށެވެ. މިއީ އެފްއޭއެމްގެ ފައިސާއާ ގުޅުންހުރި ބޮޑު ޚިޔާނާތުގެ ތަޙްޤީޤުގެ ތެރެއިން ފާހަގަވި މުޢާމަލާތްތަކަކާ ގުޅިގެން އުފުލާފައިވާ ދަޢުވާއެކެވެ.

މީގެ އިތުރުން، މަނީ ލޯންޑްރިންގެ ކުށާ ގުޅުންހުރިކަމަށް ތުހުމަތުކުރެވޭ އަމީން ކޮންސްޓްރަކްޝަންގެ އަމީން އެވެނިއު އެޕަރޓްމަންޓް އޭ-1205 އަދި އޭ-1206 އިން އެއްވެސް މުޢާމަލާތެއް ނުކުރެވޭނެ ގޮތަށް ހިފެހެއްޓުމުގެ ވަގުތީ އަމުރަކަށްވެސް ދައުލަތުން ވަނީ އެދިފައެވެ. މި އަމުރަށް އެދިފައިވަނީ މަނީ ލޯންޑްރިންގ އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ޤާނޫނުގެ 51 ވަނަ މާއްދާގެ ދަށުންނެވެ.

އެފްއޭއެމްގެ ފައިސާއިން ބައްސާމް، އަމީން އެވެނިއުގެ ދެ އެޕާޓްމެންޓް ގަތް މުއާމަލާތުގައި އަމީން ކޮންސްޓްރަކްޝަން ކުންފުނިން މަނީ ލޯންޑްރިންއަށް އެހީވި ކަމަށް ބުނެ ދައުލަތުން ކޮށްފައިވާ ދަޢުވާގައި ކްރިމިނަލް ކޯޓުން ނިންމާފައިވަނީ، މަނީ ލޯންޑާކުރުމަށް އެހީތެރިވުމުގެ ދައުވާ އަމީން ކޮންސްޓްރަކްޝަންގެ މައްޗަށް ސާބިތުނުވާ ކަމަށެވެ.

އެގޮތުން އެފްއޭއެމްގެ 1.2 މިލިއަން ޑޮލަރު ދިވެހި ރުފިޔާއަށް މާރުކުރަން އަމީންއަށް ޖަމާކޮށްފައިވާ ކަމަށާއި އެ ޑޮލަރަށްވާ ފައިސާ، ނަގުދު ފައިސާގެ ގޮތުގައި ހަސަން ވަހީދު ކިޔާ މީހަކާ ހަވާލުކޮށްފައިވާކަން ޝަރިއަތަށް ސާބިތުވާ ކަމަށާއި، އެ ފައިސާއިން ބައްސާމް އެޕާޓްމެންޓް ގަންނަން ބޭނުން ކުރި ކަމަށް ބާރުދޭ ހެއްކެއް ނެތް ކަމަށް އަމީން ކޮންސްޓްރަކްޝަންގެ މައްސަލައިގެ ޙުކުމްގައިވެއެވެ.

ނަމަވެސް އެފްއޭއެމްއިން ބޭރުކުރި 1.2 މިލިއަން ޑޮލަރަށް ލިބެންޖެހޭ ދިވެހި ފައިސާ އެފްއޭއެމްގެ އެއްވެސް އެކައުންޓަކަށް އަނބުރާ ވަދެފައިވާކަން އެނގޭކަށް ނެތުމާއި، އަމީންގެ އެޕާޓްމެންޓް ގަންނަން ނަގުދު ފައިސާ ދައްކާފައިވާ ކަމުގެ ވައުޗަރުތަކެއް އަމީން އިން ދައްކާތީ، އެފްއޭއެމްގެ ފައިސާއިން ބައްސާމް އެޕާޓްމަންޓް ގަތް މައްސަލައިގައި ބައްސާމްގެ މައްޗަށް ކުށް ސާބިތުވެ 23 އަހަރަށް ޖަލަށް ލާން މިއަދު ވަނީ ހުކުމްކޮށްފައެވެ.