އީރާނުން ރާއްޖެއަށް އެއްވެސް އެހީއެއް ވެފައި ނެތް ކަމަށާއި، ރާއްޖެއަށް ބޭނުންވާ މާލީ އެހީތެރިކަމާއި ލުއި ލޯނުތައް ފޯރުކޮށްދެނީ ސައުދީ އަރަބިއްޔާ އާއި ގަލްފު ކޯޕަރޭޝަން ކައުންސިލް (ޖީސީސީ) ގެ ގައުމުތަކުން ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވީ "ޓޫރިޒަމް އިންޑަސްޓްރީ މޯލްޑިވްސް" ކިޔާ ވަޓްސްއެޕް ގްރޫޕަކަށް ފޮނުއްވި މެސެޖެއްގައެވެ.

ރައީސް ނަޝީދު ފާހަގަކުރެއްވި ގޮތުގައި، ރާއްޖެއަށް ދަތިވާ ވަގުތުތަކުގައި ބޭނުންވާ ކޮންސެޝަނަލް ލޯނުތައް ދީފައި ހުރީ އަބަދުވެސް ގަލްފުގެ ގައުމުތަކުންނެވެ. އެހެންކަމުން އެ ގައުމުތަކަށް ގެއްލުމެއް ލިބޭ ފަދަ ކަމެއް ދިމާވުމުން ދިވެހި ސަރުކާރުން އެކަމާ ކަންބޮޑުވާން ޖެހޭނެ ކަމަށް އެމަނިކުފާނު ވިދާޅުވިއެވެ.

އީރާނުގެ ފަރާތުން ރާއްޖެއަށް އެއްވެސް އެހީއެއް ލިބިފައި ނުވާކަން ފާހަގަކުރައްވަމުން، އެ ގައުމަށް ތާއީދުކޮށް ވާހަކަދެއްކުމުގެ މުހިންމުކަމެއް ނެތްކަމަށް އެމަނިކުފާނުގެ ވާހަކަފުޅުން ދޭހަވެއެވެ.

މި މޭރުމުން ރައީސް ނަޝީދު ވާހަކަދައްކަވާފައި މިވަނީ، މެދުއިރުމަތީގައި މިހާރު ހިނގަމުންދާ ހަމަނުޖެހުންތަކާ ގުޅިގެން އީރާނަށް ތާއީދުކޮށް ސަރުކާރުން ބަހެއް ބުނެފައި ނުވާތީ، އިދިކޮޅު ފަރާތްތަކުން ސަރުކާރަށް ފާޑުކިޔަމުންދާ ދަނޑިވަޅެއްގައެވެ.

ރައީސް ނަޝީދުގެ މި ބަސްފުޅަކީ ސަރުކާރުގެ ޚާރިޖީ ސިޔާސަތު ބައްޓަންކުރުމުގައި ރާއްޖެއަށް އެހީތެރިވާ ގައުމުތަކުގެ މަސްލަހަތަށް އިސްކަންދޭންޖެހޭނެކަން ހާމަކޮށްދެއްވުމަށް ދެއްކެވި ވާހަކަފުޅެކެވެ.