ދައުލަތުން ދައްކަންޖެހޭ ސުކޫކް ދައްކަނީ ރައްކާކޮށްފައިހުރި ފައިސާއިން ކަމަށް ވިދާޅުވެ، ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ހެއްދެވީ އިތުރުފުޅެއް ކަމަށް ކުރީގެ ކޮމިއުނިކޭޝަން މިނިސްޓަރ އަދި ޕީޕަލްސް ނޭޝަނަލް ފްރަންޓް (ޕީއެންއެފް) ގެ ސެކްރެޓަރީ ޖެނެރަލް މުޙައްމަދު މަލީހް ޖަމާލް ވިދާޅުވެއްޖެއެވެ.

މަލީހް މިފަދައިން ވިދާޅުވީ، އަންނަ އޭޕްރިލް މަހުގެ 8 ވަނަ ދުވަހު ދައްކަންޖެހޭ 500 މިލިއަން ޑޮލަރުގެ ސުކޫކަށް ބޭނުންވާ ފައިސާ މިހާރުވެސް ހަމަޖެހިފައިވާ ކަމަށާއި، މިހާރުން މިހާރަށް އެ ފައިސާ ދައްކަން ޖެހުނު ނަމަވެސް އެކަމުގެ މާލީ ގާބިލުކަން ދައުލަތުގައި އެބަހުރި ކަމަށް ރައީސް މުއިއްޒު ވިދާޅުވުމާ ގުޅިގެންނެވެ. އިއްޔެ ނޫސްވެރިންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ ސުކޫކު ދެއްކުމަށްޓަކައި 650 މިލިއަން ޑޮލަރަށްވުރެ ގިނަ ފައިސާ މިހާރުވެސް ރައްކާކުރެވިފައިވާ ކަމަށެވެ.

މިކަމާ ގުޅިގެން އެކްސްގައި ހިއްސާކުރެއްވި ޕޯސްޓެއްގައި މަލީހް ވިދާޅުވީ ސުކޫކު ދައްކަނީ ރައްކާކޮށްފައި ހުރި ފައިސާއިން ކަމަށް ވިދާޅުވެ ރައީސް މުއިއްޒު ހެއްދެވީ ދޮގު ކަމަށެވެ. އަދި ރާއްޖޭގެ މުޅި މާލީ ނިޒާމު ބައްޓަންވެފައި އޮތީ ދަރަނީގެ މައްޗަށް ދަރަނި ނެގުމާއި ފައިސާ ޗާޕްކުރުމުގެ މައްޗަށް ކަމަށް އޭނާ ފާހަގަކުރެއްވިއެވެ.

މީގެ އިތުރުން، ދައުލަތުގެ ރިކަރަންޓް ޚަރަދުތަކަކީ ދެމެހެއްޓެނިވި ގޮތެއްގައި ކުރިއަށް ގެންދެވޭނެ ޚަރަދުތަކެއް ނޫން ކަމަށާއި، ކެޕިޓަލް ޚަރަދުތައް ހުރީ ވަރަށް ދަށް މިންވަރެއްގައި ކަމަށް މަލީހް ވިދާޅުވިއެވެ. އޭނާ އިތުރަށް ވިދާޅުވީ، މި ސަރުކާރުގައި އިސްރާފު އިންތިހާއަށް ބޮޑުވެފައިވާ ކަމަށާއި، ކޮރަޕްޝަންގެ އަމަލުތައް ހުރިހާ ދިމާލަކުން ފެންނަން އޮތް ކަމަށެވެ.